റിയാദ്: സഊദിയുടെ വിവിധ ഭാഗങ്ങളില്‍ വെള്ളിയാഴ്ച തുടങ്ങിയ അസ്ഥിരകാലാവസ്ഥ തുടരും. ഇതുപ്രകാരം ഇന്നും നാളെയും ഇടിമിന്നലോടുകൂടിയ ശക്തമായ മഴ തുടരുമെന്ന് ദേശീയ കാലാവസ്ഥാ കേന്ദ്രത്തിന്റെ (എന്‍.സി.എം) മുന്നറിയിപ്പ് നല്‍കി. വാരാന്ത്യത്തില്‍ ചില പ്രദേശങ്ങളില്‍ മഴയുടെ തീവ്രത വര്‍ദ്ധിക്കാന്‍ സാധ്യതയുണ്ടെന്നും കേന്ദ്രം വ്യക്തമാക്കി. മണിക്കൂറില്‍ 60 കിലോമീറ്റര്‍ വരെ വേഗതയില്‍ വീശിയടിക്കുന്ന കാറ്റ്, പൊടിക്കാറ്റ്, കാഴ്ചാപരിമിതി, ആലിപ്പഴ വീഴ്ച, ഉയര്‍ന്ന തിരമാലകള്‍ എന്നിവയ്ക്ക് പുറമെ കനത്ത മഴ ലഭിക്കുന്ന പ്രദേശങ്ങളില്‍ മിന്നല്‍ പ്രളയത്തിനും സാധ്യതയുണ്ട്.

വിവിധ പ്രവിശ്യകളിലെ കാലാവസ്ഥാ മുന്നറിയിപ്പ്:

* കിഴക്കന്‍ പ്രവിശ്യ: ദമ്മാം, ജുബൈല്‍, റാസ് തനൂറ, ഖത്തീഫ്, അല്‍ഖോബാര്‍ എന്നിവിടങ്ങളില്‍ ശനി, ഞായര്‍ ദിവസങ്ങളില്‍ ശക്തമായ മഴ ലഭിച്ചു. അല്‍അഹ്‌സ, അബ്‌ഖൈഖ് എന്നിവിടങ്ങളില്‍ ഇന്ന് മഴ ലഭിക്കും. 
* റിയാദ് പ്രവിശ്യ: വാദി അല്‍ദവാസിര്‍, സുലയ്യല്‍, അഫ്‌ലാജ് എന്നിവിടങ്ങളില്‍ നാളെ വരെ മിതമായതോ ശക്തമായതോ ആയ മഴ ലഭിക്കും. തലസ്ഥാനമായ റിയാദിലും ദിരിയ്യ, അല്‍ഖര്‍ജ്, മുസാഹിമിയ, ദുര്‍മ, മറാത്ത് തുടങ്ങിയ പ്രദേശങ്ങളിലും മഴ പ്രതീക്ഷിക്കുന്നു.
* മക്ക പ്രവിശ്യ: ത്വാഇഫ്, മയ്‌സാന്‍, അദ്ഹം, അര്‍ദിയാത്ത് എന്നിവിടങ്ങളില്‍ ചൊവ്വ വരെ ശക്തമായ മഴയ്ക്ക് സാധ്യതയുണ്ട്. തീരപ്രദേശങ്ങളായ അല്‍ലിത്ത്, ഖുന്‍ഫുദ എന്നിവിടങ്ങളില്‍ തിങ്കളാഴ്ച വരെ നേരിയ മഴയും, മക്ക നഗരം, ജുമൂം, ബഹ്‌റ, അല്‍കാമില്‍ എന്നിവിടങ്ങളില്‍ ഇന്നും നാളെയും മിതമായ മഴയും ലഭിക്കും.
* തെക്കുപടിഞ്ഞാറന്‍ പ്രദേശങ്ങള്‍: അസീര്‍, ജിസാന്‍, അല്‍ബാഹ എന്നിവിടങ്ങളില്‍ മഴയുടെ തീവ്രത കൂടും. അബഹ, ഖമീസ് മുശൈത്ത്, അഹദ് റുഫൈദ, മുഹായില്‍ അസീര്‍, ജിസാന്‍ നഗരം, സബ്യ, അബു ആരിഷ് തുടങ്ങിയ ഭാഗങ്ങളില്‍ ചൊവ്വാഴ്ച വരെ കനത്ത മഴ ലഭിക്കും.
* മറ്റ് പ്രദേശങ്ങള്‍: വടക്കന്‍ അതിര്‍ത്തി പ്രദേശങ്ങളായ റഫ്ഹ, ഉവൈഖില, ഹഫര്‍ അല്‍ബാതിന്‍, അല്‍ഖഫ്ജി എന്നിവിടങ്ങളിലും ശക്തമായ മഴ പ്രതീക്ഷിക്കുന്നു. നജ്‌റാന്‍, ബദ്ര്‍ അല്‍ജുനൂബ്, ഹുബൂന എന്നിവിടങ്ങളില്‍ ചൊവ്വാഴ്ച വരെ ശക്തമായ മഴയ്ക്കും, മദീന, ഖൈബര്‍, അല്‍ഉല, ഹനാകിയ എന്നിവിടങ്ങളില്‍ ചൊവ്വാഴ്ചയോടെ നേരിയ മഴയ്ക്കും സാധ്യതയുണ്ടെന്ന് കാലാവസ്ഥാ കേന്ദ്രം അറിയിച്ചു.

Summary: The Saudi Aabia National Center for Meteorology (NCM) has forecast thunderstorms to continue across multiple regions of the Kingdom from Friday through Tuesday, with rainfall ranging from light to heavy, intensifying in several areas.