കാങ്കര്‍: ഛത്തീസ്ഗഡിലെ കാങ്കര്‍ ജില്ലയില്‍ തലക്ക് അഞ്ചുലക്ഷം രൂപ വിലയിട്ട വനിത മാവോവാദി അംഗം കൊല്ലപ്പെട്ടു. സുരക്ഷാസേനയുമായുള്ള ഏറ്റുമുട്ടലില്‍ രൂപിയെന്ന മാവോവാദി കൊല്ലപ്പെട്ടതായി ദേശീയ മാധ്യമങ്ങള്‍ റിപ്പോര്‍ട്ട് ചെയ്തു. 

കഴിഞ്ഞ വര്‍ഷം കൊല്ലപ്പെട്ട മാവോവാദി ഏരിയ കമ്മിറ്റി അംഗം ദണ്ഡകാരണ്യ സ്‌പെഷല്‍ സോണല്‍ കമ്മിറ്റി അംഗം വിജയ് റെഡ്ഡിയുടെ ഭാര്യയാണ് മരിച്ച രൂപി. കാങ്കര്‍ അടക്കം ഏഴ് ജില്ലകള്‍ ഉള്‍ക്കൊള്ളുന്ന നക്‌സല്‍ മേഖലയായ ബസ്തറിലെ തെലുഗു കേഡറിലെ അവസാന മുതിര്‍ന്ന നേതാവാണ് ഇവര്‍. 

ALSO READ: തെലങ്കാനയിൽ ഇന്റർമീഡിയറ്റ് പരീക്ഷാഫലം പ്രഖ്യാപിച്ചതിന് പിന്നാലെ ആത്മഹത്യ ചെയ്തത് ഏഴ് വിദ്യാർഥികൾ 

ചോട്ടെബേതിയ-പാര്‍ഥാപൂര്‍ പൊലിസ് സ്റ്റേഷന്‍ പരിധിയിലെ മാച്ച്പള്ളി വനത്തിലാണ് തിങ്കളാഴ്ച്ച പുലര്‍ച്ചെ ഏറ്റുമുട്ടലുണ്ടായത്. ഇന്റലിജന്‍സ് റിപ്പോര്‍ട്ടിന്റെ അടിസ്ഥാനത്തില്‍ നക്‌സല്‍ വിരുദ്ധ സുരക്ഷാസേന ഓപ്പറേഷന്‍ ആരംഭിച്ചെന്നും, ഏറ്റുമുട്ടലിന് ശേഷമുള്ള പരിശോധനയിലാണ് രൂപിയുടെ മൃതദേഹം കണ്ടെത്തിയതെന്നും കാങ്കര്‍ എസ്പി നിഖില്‍ രഖേച്ച പറഞ്ഞു. 

നേരത്തെ മാര്‍ച്ച് 31ഓടെ സംസ്ഥാനം മാവോവാദി മുക്തമായതായി സര്‍ക്കാര്‍ പ്രഖ്യാപിച്ചിരുന്നു. ഈ വര്‍ഷം ഇതുവരെ 28 മാവോവാദികളാണ് സംസ്ഥാനത്ത് കൊല്ലപ്പെട്ടത്. കഴിഞ്ഞവര്‍ഷം 285 പേര്‍ കൊല്ലപ്പെട്ടിരുന്നു.

woman maoist with a bounty of five lakh rupees on her head was killed in kanker district, chhattisgarh.