മക്ക: ഈ വർഷത്തെ ഹജ്ജിന് മുന്നോടിയായി മക്കയിലെ മസ്ജിദുൽ ഹറാമിൽ കഅ്ബയെ പുതപ്പിക്കുന്ന വിശുദ്ധ വസ്ത്രമായ കിസ്‌വ ഉയർത്തിക്കെട്ടി. പത്ത് ദിവസത്തിലധികം നീണ്ടുനിന്ന അറ്റകുറ്റപ്പണികൾക്ക് ശേഷം ശനിയാഴ്ച പുലർച്ചെ ഒരു മണിയോടെയാണ് കിസ്‌വ ഉയർത്തിയത്. ഇതോടെ ഈ വർഷത്തെ ഹജ്ജ് സീസണിന് ഔദ്യോഗിക തുടക്കമായി.

തീർത്ഥാടകരുടെ തിരക്കിൽ കേടുപാടുകൾ സംഭവിക്കാതിരിക്കാൻ എല്ലാ വർഷവും ഹജ്ജ് സീസണിൽ കിസ്‌വ ഉയർത്തിക്കെട്ടുന്നത് പതിവാണ്. കഅ്ബയ്ക്ക് ചുറ്റും ത്വവാഫ് ചെയ്യുന്നതിനായി ദശലക്ഷക്കണക്കിന് തീർത്ഥാടകർ അടുത്തെത്തുമ്പോൾ, നിരന്തരമായ സ്പർശനം കാരണം തുണിക്ക് കേടുപാടുകൾ സംഭവിക്കുന്നത് ഒഴിവാക്കാനാണിത്. മസ്ജിദുൽ ഹറാമിൽ ഏറ്റവും കൂടുതൽ തിരക്ക് അനുഭവപ്പെടുന്ന ഹജ്ജ് കാലയളവിൽ കിസ്‌വ സുരക്ഷിതമായി സംരക്ഷിക്കാൻ ഇതിലൂടെ സാധിക്കും.

അന്താരാഷ്ട്ര ഹജ്ജ് വിമാന സർവീസുകൾ ആരംഭിക്കുന്ന ദിവസമാണ് കിസ്‌വ ഉയർത്തിയതെന്നതും ശ്രദ്ധേയമാണ്. പാകിസ്ഥാൻ, ബംഗ്ലാദേശ്, ഇന്ത്യ, ഇന്തോനേഷ്യ എന്നിവിടങ്ങളിൽ നിന്നുള്ള തീർത്ഥാടകരുമായുള്ള ആദ്യ വിമാനങ്ങൾ സഊദി അറേബ്യയിൽ ഇറങ്ങുന്നതും ശനിയാഴ്ചയാണ്. ഹജ്ജ് കർമ്മങ്ങൾ പൂർത്തിയായ ശേഷം മാത്രമേ കിസ്‌വ പഴയതുപോലെ താഴേക്ക് ഇറക്കിയിടുകയുള്ളൂ.

അതേസമയം ഇന്ത്യയിലെ വിവിധ എംബാർക്കേഷൻ പോയിന്റുകളിൽ നിന്നായി 1.75 ലക്ഷത്തിലധികം ഇന്ത്യൻ തീർഥാടകരാണ് ഇത്തവണ സഊദി അറേബ്യയിലേക്ക് യാത്ര തിരിക്കുന്നത്. മാസപ്പിറവിക്ക് വിധേയമായി മെയ് 24 നും മെയ് 29 നും ഇടയിലായിരിക്കും ഈ വർഷത്തെ ഹജ്ജ് കർമ്മങ്ങൾ നടക്കുക.

English summary : The Kiswa — the embroidered black cloth that covers the Kaaba at Masjid al-Haram in Makkah — was lifted in the early hours of April 18, 2026, at 1 AM, signalling the official start of the Hajj 2026 season.

The lifting came at the conclusion of a maintenance period lasting more than 10 days, as previously confirmed by The Islamic Information.