തിരുവനന്തപുരം: സംസ്ഥാനത്ത് മില്‍മ പാലിന്റെ വില വര്‍ധിപ്പിച്ചേക്കും. ലിറ്ററിന് ആറ് രൂപ വര്‍ധിപ്പിക്കണമെന്നാണ് ആവശ്യം. വിഷയത്തില്‍  ഈ മാസം 29ന് ചേരുന്ന ഡയറക്ടര്‍ ബോര്‍ഡ് യോഗത്തില്‍ തീരുമാനം ഉണ്ടായേക്കും. 

വിലവര്‍ധിപ്പിക്കാന്‍ അനുമതി തേടി ബോര്‍ഡ് സര്‍ക്കാരിന് വീണ്ടും കത്ത് നല്‍കുമെന്ന് മില്‍മ ചെയര്‍മാന്‍ കെ.എസ് മണി പറഞ്ഞു. മൂന്ന് വര്‍ഷമായി വില വര്‍ധവുണ്ടായിട്ടില്ല. വില കൂട്ടാതെ പിടിച്ച് നില്‍ക്കാന്‍ കഴിയില്ലെന്നും  മണി പറഞ്ഞു.

അതേസമയം, മില്‍മ ഫെഡറേഷന്‍ തീരുമാനിച്ച പാല്‍വില വര്‍ധന ഉടന്‍ നടപ്പാക്കണമെന്ന് ആവശ്യപ്പെട്ട് എറണാകുളം മേഖല ക്ഷീരോല്‍പാദക യൂനിയനിലെ മില്‍മ ഫെഡറേഷന്‍ ഭരണസമിതി അംഗങ്ങള്‍ ചെയര്‍മാനും മാനേജിങ് ഡയറക്ടര്‍ക്കും കത്ത് നല്‍കുകയും ഫെഡറേഷന്‍ ഓഫിസിന് മുന്നില്‍ കുത്തിയിരുപ്പ് സമരവും നടത്തി. 

കാലിത്തീറ്റയുടെ വിലവര്‍ധനവും നിത്യോപയോഗ സാധനങ്ങളുടെ വില വര്‍ധനവും കൂലിച്ചെലവിന്റെ വര്‍ധനയും മൂലം ക്ഷീര മേഖല കടക്കെണിയിലാണ്. കടുത്ത വേനലും ചൂടും വര്‍ധിച്ചതോടെ പശുക്കളുടെ പാലുല്‍പ്പാദനം ഗണ്യമായി കുറഞ്ഞതും വന്‍ തിരിച്ചടിയായി. ചെറുകിട കര്‍ഷകര്‍ ഈ രംഗത്തുനിന്ന് പൂര്‍ണമായി കൊഴിഞ്ഞു പോകുകയാണ്. ഇനിയും ഈ രംഗത്ത് അവശേഷിക്കുന്നവരെ സംരക്ഷിക്കേണ്ടത് മില്‍മയുടെ കടമയാണ്. ഈ പ്രത്യേക സാഹചര്യം കണക്കിലെടുത്ത് പാല്‍ വിലവര്‍ധനവ് ഉടന്‍ നടപ്പാക്കണമെന്നാണ് അംഗങ്ങളുടെ ആവശ്യം.

Milma may increase milk prices, with a proposal to raise the rate by ₹6 per litre. The demand comes amid rising production and operational costs in the dairy sector. If approved, the hike could impact household expenses across Kerala, as consumers closely watch the decision. Authorities are expected to review the proposal before taking a final call.