മദീന: സഊദിയുടെ 'സ്റ്റഡി ഇൻ സഊദി' പ്ലാറ്റ്‌ഫോം വഴി മദീന ഇസ്‌ലാമിക് യൂണിവേഴ്സിറ്റി വിദേശ വിദ്യാർത്ഥികൾക്കായി അപേക്ഷകൾ ക്ഷണിക്കുന്നു. സഊദിയിൽ ഉന്നതവിദ്യാഭ്യാസം ആഗ്രഹിക്കുന്നവർക്ക് ബിരുദ, ബിരുദാനന്തര, ഗവേഷണ പ്രോഗ്രാമുകളിലേക്ക് ഈ കേന്ദ്രീകൃത ഓൺലൈൻ പോർട്ടൽ വഴി അപേക്ഷ സമർപ്പിക്കാവുന്നതാണ്.

 പുതിയ അധ്യയന വർഷത്തേക്കുള്ള അപേക്ഷകൾ മെയ് 21 വരെയാണ് സ്വീകരിക്കുന്നത്. രാജ്യത്തിന് പുറത്തുള്ള അന്താരാഷ്ട്ര വിദ്യാർത്ഥികൾക്കും, യോഗ്യരായ ബിരുദാനന്തര റസിഡൻ്റുകൾക്കും ഇതിലൂടെ അപേക്ഷിക്കാൻ അവസരമുണ്ട്.

വിവിധ പഠന ശാഖകളിലായി 147 അക്കാദമിക് പ്രോഗ്രാമുകളാണ് മദീന ഇസ്‌ലാമിക് യൂണിവേഴ്സിറ്റിയിൽ ലഭ്യമായിട്ടുള്ളത്. ഇതിനുപുറമെ, റിയാദിലെ കിങ് സൗദ് യൂണിവേഴ്സിറ്റി, പ്രിൻസസ് നൂറ ബിൻ്റ് അബ്ദുൽറഹ്മാൻ യൂണിവേഴ്സിറ്റി, ജിദ്ദ യൂണിവേഴ്സിറ്റി, കിങ് അബ്ദുൽ അസീസ് യൂണിവേഴ്സിറ്റി, തൈബ, ഖാസിം, ഉമ്മുൽ ഖുറ, കിങ് ഖാലിദ്, തബൂക്ക്, ശഖ്‌റ, മജ്‌മ യൂണിവേഴ്സിറ്റികൾ എന്നിവയും ഈ പ്ലാറ്റ്‌ഫോമിൽ ഉൾപ്പെടുത്തിയിട്ടുണ്ട്.

ആധുനിക അക്കാദമിക് പ്രോഗ്രാമുകൾ, ഗവേഷണ അവസരങ്ങൾ, മികച്ച വിദ്യാർത്ഥി പിന്തുണ എന്നിവ പോർട്ടൽ ഉറപ്പുനൽകുന്നു. ഔദ്യോഗിക 'സ്റ്റഡി ഇൻ സഊദി' പോർട്ടൽ വഴി വിദ്യാർത്ഥികൾക്ക് പ്രവേശന യോഗ്യതകളും കോഴ്‌സ് വിവരങ്ങളും അപേക്ഷാ നടപടികളും പരിശോധിക്കാവുന്നതാണ്. സഊദിയുടെ വിഷൻ 2030 പദ്ധതിയുടെ ഭാഗമായി അന്താരാഷ്ട്ര പ്രതിഭകളെ ആകർഷിക്കാനും വിദ്യാഭ്യാസ മേഖലയിലെ ലക്ഷ്യങ്ങൾ കൈവരിക്കാനും ലക്ഷ്യമിട്ടുള്ളതാണ് ഈ സംരംഭം.

ഫ്രീ ആയി പഠിക്കാനും അവസരം 

സഊദിയുടെ 'study in saudi' പോർട്ടൽ വഴി അപേക്ഷിക്കുമ്പോൾ പഠനം തികച്ചും സൗജന്യമാക്കാനും (സ്കോളർഷിപ്പ് വഴി) ഫീസ് നൽകി പഠിക്കാനുമുള്ള അവസരങ്ങളുണ്ട്.

പോർട്ടലിൽ അപേക്ഷിക്കുമ്പോൾ പ്രധാനമായും മൂന്ന് ഓപ്ഷനുകളാണുള്ളത്:

1. പൂർണ്ണമായും സൗജന്യമായ സ്കോളർഷിപ്പ് (Fully Funded): മദീന ഇസ്‌ലാമിക് യൂണിവേഴ്സിറ്റി ഉൾപ്പെടെയുള്ള ഒട്ടുമിക്ക സഊദി സർവ്വകലാശാലകളും വിദേശ വിദ്യാർത്ഥികൾക്ക് നൽകുന്നത് ഈ സ്കോളർഷിപ്പാണ്. ഇതിൽ ട്യൂഷൻ ഫീസ് പൂർണ്ണമായും സൗജന്യമാണ്. കൂടാതെ പ്രതിമാസ അലവൻസ് (സ്റ്റൈപ്പൻഡ്), സൗജന്യ താമസം, നാട്ടിൽ പോയിവരാനുള്ള വിമാന ടിക്കറ്റ്, ആരോഗ്യ പരിരക്ഷ എന്നിവയും ലഭിക്കും.

2. ഭാഗികമായ സ്കോളർഷിപ്പ് (Partially Funded): ട്യൂഷൻ ഫീസിൽ ഇളവ് ലഭിക്കുന്ന സ്കോളർഷിപ്പുകളാണിത്.

3. ഫീസ് നൽകിയുള്ള പഠനം (Self-Funded): വിദ്യാർത്ഥി സ്വന്തമായി ട്യൂഷൻ ഫീസും മറ്റ് ചെലവുകളും വഹിക്കേണ്ട കോഴ്സുകളും ലഭ്യമാണ്.

മദീന യൂണിവേഴ്സിറ്റിയുടെ പ്രത്യേകത:

മദീന ഇസ്‌ലാമിക് യൂണിവേഴ്സിറ്റിയിലേക്ക് തിരഞ്ഞെടുക്കപ്പെടുന്ന വിദേശ വിദ്യാർത്ഥികൾക്ക് സാധാരണയായി പൂർണ്ണമായും സൗജന്യമായ സ്കോളർഷിപ്പ് (Fully Funded Scholarship) ആണ് ലഭിക്കാറുള്ളത്. അതിനാൽ അവിടെ ഫീസ് ഇല്ലാതെ തന്നെ പഠിക്കാൻ സാധിക്കും.

അപേക്ഷകർക്ക് പോർട്ടൽ വഴി അപേക്ഷ സമർപ്പിക്കുമ്പോൾ തങ്ങൾക്ക് ഏത് തരത്തിലുള്ള ഫണ്ടിംഗ് ഓപ്ഷനാണ് വേണ്ടതെന്ന് (Fully funded, Partially funded, Self-funded) തിരഞ്ഞെടുക്കാവുന്നതാണ്.

English summary: The Islamic University of Madinah has opened applications for students from abroad through Saudi Arabia’s “Study in Saudi” platform, offering opportunities for those seeking higher education in the Kingdom.

Applicants can apply for undergraduate, postgraduate and research programmes through the centralised online portal, which connects students with universities across Saudi Arabia.