റിയാദ്: മസ്തിഷ്‌കവും പ്രധാന സിരകളും ഒട്ടിപ്പിടിച്ച നിലയിലുള്ള ഫിലിപ്പൈന്‍ കുഞ്ഞുങ്ങളായ സയാമീസ് ഇരട്ടകളെവേര്‍പെടുത്തുന്നതിനുള്ള ലോകത്തെ തന്നെ ഏറ്റവും സങ്കീര്‍ണമായ ശസ്ത്രക്രിയ റിയാദില്‍ ആരംഭിച്ചു. ഫിലിപ്പീന്‍സ് സ്വദേശികളായ ക്ലിയ, മോറിസ് ആനി എന്നീ പെണ്‍കുട്ടികളാണ് റിയാദിലെ കിങ് അബ്ദുല്ല സ്‌പെഷ്യലിസ്റ്റ് ചില്‍ഡ്രന്‍സ് ആശുപത്രിയില്‍ ശസ്ത്രക്രിയക്ക് വിധേയരാകുന്നത്. സൗദി ഭരണാധികാരി സല്‍മാന്‍ രാജാവിന്റെയും കിരീടാവകാശി മുഹമ്മദ് ബിന്‍ സല്‍മാന്റെയും പ്രത്യേക നിര്‍ദേശപ്രകാരമാണ് ശസ്ത്രക്രിയ നടക്കുന്നത്.

പ്രശസ്ത സര്‍ജന്‍ ഡോ. അബ്ദുല്ല അല്‍ റബീഅയുടെ നേതൃത്വത്തിലുള്ള 30 അംഗ വിദഗ്ധ സംഘമാണ് ദൗത്യത്തിന് പിന്നില്‍. 2025 മെയ് മുതല്‍ നിരീക്ഷണത്തിലായിരുന്ന കുട്ടികളുടെ തലച്ചോറിലെ കോശങ്ങളും സിരകളും ഇഴുകിച്ചേര്‍ന്ന അവസ്ഥയിലായതിനാല്‍ അതീവ ജാഗ്രതയോടെയാണ് ഡോക്ടര്‍മാര്‍ നീങ്ങുന്നത്.

 ഇതിനുപുറമെ ക്ലിയ എന്ന കുട്ടിക്ക് ഹൃദയ, വൃക്ക സംബന്ധമായ തകരാറുകളുള്ളത് വെല്ലുവിളിയുടെ ആഴം കൂട്ടുന്നു. അഞ്ച് ഘട്ടങ്ങളിലായി 24 മണിക്കൂര്‍ നീണ്ടുനില്‍ക്കുന്ന ശസ്ത്രക്രിയയില്‍ 50 ശതമാനത്തോളം അപകടസാധ്യതയുണ്ടെന്നാണ് റിപോര്‍ട്ടുകള്‍ പറയുന്നത്.

A specialized medical team in Riyadh has commenced a highly complex, 24-hour surgery to separate Filipino conjoined twins whose brains and vital veins are interconnected.