മലപ്പുറം: കെഎസ്ആര്‍ടിസി ബസ്സില്‍ ശാരീരിക അസ്വസ്ഥതകളുള്ള യാത്രക്കാരന് സീറ്റ് നിഷേധിക്കുകയും നിശ്ചിത സ്റ്റോപ്പില്‍ ഇറക്കാതിരിക്കുകയും ചെയ്തതിന് നല്‍കേണ്ടി വന്നത് കനത്ത പിഴ. മലപ്പുറം തോട്ടശ്ശേരിയറ സ്വദേശി മുഹമ്മദ് സൈനുദ്ദീന്‍ കോര്‍മത്ത് നല്‍കിയ പരാതിയില്‍ 30,000 രൂപ നഷ്ടപരിഹാരം നല്‍കാന്‍ ജില്ലാ ഉപഭോക്തൃ കമ്മീഷന്‍ ഉത്തരവിട്ടു. കെഎസ്ആര്‍ടിസി എംഡി പരാതിക്കാരന് ഈ തുക നല്‍കണം.

തൃശൂര്‍ ആമ്പല്ലൂരില്‍ നിന്ന് കൊളപ്പുറത്തേക്ക് പോകാനാണ് മുഹമ്മദ് സൈനുദ്ദീന്‍ ബസില്‍ കയറിയത്. രോഗബാധിതനായ തനിക്ക് മൂന്ന് മണിക്കൂര്‍ നിന്നുള്ള യാത്ര പ്രയാസമാണെന്ന് അദ്ദേഹം കണ്ടക്ടറെ അറിയിച്ചിരുന്നു. തൃശൂര്‍ എത്തുമ്പോള്‍ സീറ്റ് നല്‍കാമെന്നായിരുന്നു കണ്ടക്ടറുടെ ഉറപ്പ്. എന്നാല്‍ തൃശൂരില്‍ സീറ്റില്‍ ഇരുന്ന സൈനുദ്ദീനെ, റിസര്‍വേഷന്‍ ഉണ്ടെന്ന് പറഞ്ഞ് കണ്ടക്ടര്‍ എഴുന്നേല്‍പ്പിക്കുകയും ചെയ്തു. മറ്റു സീറ്റുകള്‍ ഇതിനോടകം നിറഞ്ഞതിനാല്‍ സൈനുദ്ദീന് യാത്രയിലുടനീളം നില്‍ക്കേണ്ടിയും വന്നു.

യാത്രക്കാരന്റെ ദുരിതം അവിടെയും തീര്‍ന്നില്ല. ബസ് സര്‍വീസ് റോഡിലൂടെ പോകാതെ ദേശീയപാതയിലൂടെ പോയതിനാല്‍ ഇദ്ദേഹം ഇറങ്ങേണ്ട 'കക്കാട്' സ്റ്റോപ്പില്‍ നിര്‍ത്താന്‍ ജീവനക്കാര്‍ തയ്യാറായില്ല. ഒടുവില്‍ കിലോ മീറ്ററുകള്‍ അകലെയുള്ള കൂരിയാട് സ്റ്റോപ്പിലാണ് ഇദ്ദേഹത്തെ ഇറക്കിയത്.

 ALSO READ: കള്ളനെ പേടിച്ച് പുസ്തകത്തില്‍ ഒളിപ്പിച്ചുവച്ച 6 പവന്‍ സ്വര്‍ണം ആക്രിക്കടയിലെത്തി; മണിക്കൂറുകള്‍ നീണ്ട തിരച്ചിലിനൊടുവില്‍ മോചനം

വിധി ഇങ്ങനെ
കെഎസ്ആര്‍ടിസിയുടെ ഭാഗത്ത് നിന്ന് സേവന വീഴ്ചയുണ്ടായെന്ന് കോടതി കണ്ടെത്തി. 25,000 രൂപ നഷ്ടപരിഹാരമായും 5,000 രൂപ കോടതി ചെലവായും നല്‍കാനാണ് കെ. മോഹന്‍ദാസ് പ്രസിഡന്റായ കമ്മീഷന്‍ ഉത്തരവിട്ടത്. 45 ദിവസത്തിനകം തുക നല്‍കിയില്ലെങ്കില്‍ 9 ശതമാനം പലിശ സഹിതം നല്‍കേണ്ടി വരും.

The Malappuram District Consumer Commission has ordered KSRTC to pay ₹30,000 as compensation to a sick passenger who was denied a seat and forced to overshoot his destination due to the negligence of the bus crew.