കൽപ്പറ്റ: ഉരുൾ ദുരന്തബാധിതർക്കായി മുസ്‌ലിം ലീഗ് വെള്ളിത്തോട് നിർമിച്ചു നൽകിയ 51 വീടുകളിലേക്ക് അവർ ഇന്ന് ഔദ്യോഗികമായി കേറിക്കൂടും. 
വീട് അവർക്ക് സ്വന്തമായിട്ട് രണ്ടുമാസങ്ങൾ പിന്നിട്ടെങ്കിലും തങ്ങളുടേതായ രീതിയിൽ നേതാക്കൾക്ക് അടക്കം സൽക്കാരങ്ങളൊരുക്കി വീട് കൂടൽ നടത്തണമെന്ന കുടുംബങ്ങളുടെ ആഗ്രഹമാണ് ഇന്ന് നടക്കാൻ പോകുന്നത്. മുസ് ലിം ലീഗ് സംസ്ഥാന പ്രസിഡന്റ് പാണക്കാട് സയ്യിദ് സാദിഖലി ശിഹാബ് തങ്ങൾ അടക്കമുള്ള നേതാക്കൾ ഇന്ന് വൈകിട്ട് നാലിന് നടക്കുന്ന വീട് കൂടൽ ചടങ്ങിൽ പങ്കെടുക്കും. 
കൽപ്പറ്റ ടൗണിൽനിന്ന് എട്ട് കിലോമീറ്റർ പരിധിയിലാണ് പ്രൊജക്ട് സൈറ്റ്. വെള്ളിത്തോട് 11.5 ഏക്കർ ഭൂമി 14,13,21,438 രൂപ ചെലവഴിച്ചാണ് ലീഗ് വാങ്ങിയത്. എട്ട് സെന്റിൽ 1060 സ്‌ക്വയർഫീറ്റിലാണ് സ്‌നേഹഭവനങ്ങൾ. ആദ്യഘട്ടത്തിലെ 51 കുടുംബംഗങ്ങളെയും നറുക്കെടുപ്പിലൂടെയാണ് തിരഞ്ഞെടുത്തത്. 
മറ്റ് വീടുകളുടെയും നിർമാണങ്ങളും പദ്ധതി പ്രദേശത്ത് അവസാനഘട്ടത്തിലാണ്. വീടുകളിലേക്ക് ആവശ്യമായ ശുദ്ധജലത്തിന് സൗകര്യവും ഒരുക്കിയിട്ടുണ്ട്. വീടുകൾക്കൊപ്പം ഫർണിച്ചറുകളും മുസ്‌ലിം ലീഗ് നൽകി.