ന്യൂഡല്‍ഹി: മുന്‍കൂര്‍ ജാമ്യാപേക്ഷ തള്ളാന്‍ കോടതിക്ക് അധികാരമുണ്ടെങ്കിലും പ്രതിയോട് വിചാരണ കോടതിയില്‍ കീഴടങ്ങണമെന്ന് നിര്‍ദേശിക്കാന്‍ അധികാരമില്ലെന്ന് സുപ്രിംകോടതി. വഞ്ചന, വ്യാജരേഖ ചമയ്ക്കല്‍ എന്നീ കേസുകളില്‍ പ്രതിചേര്‍ക്കപ്പെട്ട ജാര്‍ഖണ്ഡ് സ്വദേശി നല്‍കിയ ഹരജി പരിഗണിക്കവെ ജസ്റ്റിസുമാരായ ജെ.ബി പര്‍ദിവാല, ഉജ്ജല്‍ ഭുയാന്‍ എന്നിവരടങ്ങിയ ബെഞ്ചിന്റെതാണ് സുപ്രധാന നിരീക്ഷണം. മുന്‍കൂര്‍ ജാമ്യാപേക്ഷ തള്ളിയ ജാര്‍ഖണ്ഡ് ഹൈക്കോടതി, പ്രതിയോട് വിചാരണ കോടതിയില്‍ കീഴടങ്ങാനും സാധാരണ ജാമ്യത്തിനായി അപേക്ഷിക്കാനും നിര്‍ദ്ദേശിച്ചിരുന്നു. ഇതിനെയാണ് പ്രതി സുപ്രിംകോടതിയില്‍ ചോദ്യംചെയ്തത്. 
മുന്‍കൂര്‍ ജാമ്യം തള്ളാന്‍ കോടതിക്ക് തീരുമാനിക്കാമെങ്കിലും പ്രതി കീഴടങ്ങണമെന്ന് പറയാന്‍ കോടതിക്ക് അധികാരമില്ലെന്ന് സുപ്രിംകോടതി വ്യക്തമാക്കി. ഭൂമി തര്‍ക്കവുമായി ബന്ധപ്പെട്ട് ഐ.പി.സിയിലെ വിവിധവകുപ്പുകള്‍ പ്രകാരം മജിസ്‌ട്രേറ്റിന് മുന്‍പാകെ നല്‍കിയ പരാതിയിലാണ് ഹരജിക്കാരന്‍ പ്രതിയായത്. പ്രതിയുടെ ആദ്യ മുന്‍കൂര്‍ ജാമ്യാപേക്ഷ തള്ളിയപ്പോള്‍ തന്നെ കീഴടങ്ങാന്‍ ഹൈക്കോടതി നിര്‍ദ്ദേശിച്ചിരുന്നു. സാഹചര്യങ്ങളില്‍ മാറ്റമില്ലെന്ന് ചൂണ്ടിക്കാട്ടി രണ്ടാമത്തെ അപേക്ഷയും ഹൈക്കോടതി തള്ളിയതോടെയാണ് ഹരജിക്കാരന്‍ പരമോന്നത കോടതിയെ സമീപിച്ചത്. 
ഇത്തരമൊരു നിര്‍ദ്ദേശം നല്‍കുന്നത് കോടതിയുടെ അധികാരപരിധിക്ക് പുറത്താണെന്ന് ചൂണ്ടിക്കാട്ടിയ സുപ്രിംകോടതി, ഹൈക്കോടതിയുടെ നടപടി നിയമവിരുദ്ധമാണെന്ന് ഉത്തരവിട്ടു. മുന്‍കൂര്‍ ജാമ്യം നിരസിച്ചാലും പ്രതിയെ കീഴടങ്ങാന്‍ നിര്‍ബന്ധിക്കാന്‍ കോടതിക്ക് കഴിയില്ലെന്ന് രണ്ടംഗബെഞ്ച് ആവര്‍ത്തിച്ച് വ്യക്തമാക്കി.