കൊല്ലം: ഒരുമിച്ചു താമസിക്കുകയായിരുന്ന സുഹൃത്തായ സ്ത്രീയെ പെട്രോളൊഴിച്ച് കൊലപ്പെടുത്താന്‍ ശ്രമിക്കുന്നതിനിടെ ഗുരുതരമായി പൊള്ളലേറ്റ് ചികിത്സയിലായിരുന്ന പ്രതി മരിച്ചു. ക്ലാപ്പന കുറ്റിയടുത്തുമുക്ക് മാപ്പിള അയ്യത്ത് വീട്ടില്‍ രഘു (56) ആണ് മരിച്ചത്. ആക്രമണത്തിനിരയായ ഓച്ചിറ ചങ്ങന്‍കുളങ്ങര സ്വദേശിനി പ്രസന്ന (45) മെഡിക്കല്‍ കോളജ് ആശുപത്രിയില്‍ തീവ്രപരിചരണ വിഭാഗത്തില്‍ തുടരുകയാണ്.

കഴിഞ്ഞ ബുധനാഴ്ച രാവിലെ ഏഴരയോടെയാണ് നാടിനെ നടുക്കിയ സംഭവം. ഏറെ നാളായി രഘുവും പ്രസന്നയും ഒരുമിച്ചായിരുന്നു താമസം. പ്രസന്നയുടെ മകളുടെ സൈക്കിള്‍ രഘു എടുത്തു കൊണ്ടുപോയതിനെ ചൊല്ലിയുണ്ടായ തര്‍ക്കമാണ് അക്രമത്തില്‍ കലാശിച്ചത്. തര്‍ക്കത്തിനിടെ രഘു കൈയില്‍ കരുതിയിരുന്ന പെട്രോള്‍ പ്രസന്നയുടെ തലയിലൂടെ ഒഴിച്ച് തീ കൊളുത്തുകയായിരുന്നു.

ALSO READ: ഒരേ വീടിനുള്ളില്‍ 5 വെള്ളിക്കെട്ടന്‍മാര്‍; രണ്ടിടത്ത് പാമ്പ് കടിയേറ്റു; കണ്ണൂരില്‍ സ്‌കൂട്ടറിനുള്ളില്‍ മൂര്‍ഖന്‍ പാമ്പ്- ജാഗ്രതാനിര്‍ദേശം

തീ ആളിക്കത്തിയതോടെ പ്രസന്നയെ പിടിച്ചിരുന്ന രഘുവിലേക്കും തീ പടരുകയായിരുന്നു. ഇരുവരെയും ഉടന്‍ തന്നെ ആലപ്പുഴ വണ്ടാനം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചെങ്കിലും ഇന്നലെ രാവിലെ രഘു മരണത്തിന് കീഴടങ്ങി. രഘുവിന്റെ മൃതദേഹം വണ്ടാനം മെഡിക്കല്‍ കോളജ് മോര്‍ച്ചറിയില്‍ സൂക്ഷിച്ചിരിക്കുകയാണ്.

A 56-year-old man from Kollam died of burn injuries sustained while attempting to set a woman on fire during a dispute over a bicycle.