മുംബൈ: മുംബൈയിലെ പൈധുനിയില്‍ ഒരു കുടുംബത്തിലെ നാലുപേരെ ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തി. അബ്ദുല്ല ദൊകാഡിയ (40), ഭാര്യ നസ്രിന്‍ (35), മക്കളായ ആയിഷ (16), സൈനബ് (13) എന്നിവരാണ് മരിച്ചത്. ഏപ്രില്‍ 25 ശനിയാഴ്ച്ച ഇവരുടെ വീട്ടില്‍ ബന്ധുക്കള്‍ക്കായി വിരുന്ന് സംഘടിപ്പിച്ചിരുന്നു. ഇതിന് പിന്നാലെയാണ് മരണം. 

ഭക്ഷണത്തില്‍ നിന്നുള്ള വിഷബാധയാണ് മരണകാരണമെന്നാണ് പ്രാഥമിക നിഗമനം. വിരുന്നിന്റെ ഭക്ഷണം കഴിച്ചതിന് പുറമെ നാലുപേരും വീട്ടില്‍ നിന്ന് തണ്ണിമത്തനും കഴിച്ചിട്ടുണ്ട്. ഇതില്‍ നിന്ന് വിഷാംശം ഉള്ളില്‍ ചെന്നതാകാമെന്നാണ് അനുമാനം. അസ്വാഭാവിക മരണത്തില്‍ വിശദമായ അന്വേഷണം നടക്കുകയാണ്.

ALSO READ: നെടുങ്കട്ടത്ത് വീട്ടുവളപ്പില്‍ കുഴിച്ചിട്ട നിലയില്‍ മൃതദേഹാവശിഷ്ടങ്ങള്‍; ഇരട്ടക്കൊലപാതകമെന്ന് സംശയം

ശനിയാഴ്ച്ച രാത്രിയിലെ വിരുന്നില്‍ ബന്ധുക്കള്‍ ഉള്‍പ്പെടെ 9 പേരാണ് പങ്കെടുത്തത്. എന്നാല്‍ ബന്ധുക്കള്‍ക്ക് ആര്‍ക്കും ആരോഗ്യ പ്രശ്‌നങ്ങള്‍ ഉണ്ടായിട്ടില്ല. ഇതിന് ശേഷമാണ് കുടുംബം തണ്ണിമത്തന്‍ കഴിച്ചത്. പുലര്‍ച്ചയോടെ ഓരോരുത്തര്‍ക്കായി ദേഹസ്വാസ്ഥ്യം അനുഭവപ്പെടാന്‍ തുടങ്ങി. ഉടന്‍തന്നെ സമീപത്തുള്ള ക്ലിനിക്കില്‍ പ്രവേശിപ്പിച്ചെങ്കിലും ആരോഗ്യനില വഷളായതിനെ തുടര്‍ന്ന് സര്‍ ജെ.ജെ ആശുപത്രിയിലേക്ക് മാറ്റുകയായിരുന്നു. ചികിത്സക്കിടെ ഇളയ മകള്‍ സൈനബ് ആണ് ആദ്യം മരിച്ചത്. തുടര്‍ന്ന് പിതാവും, ശേഷം മൂത്തമകളും, ഉമ്മയും മരണത്തിന് കീഴടങ്ങി. 

കൂട്ടമരണത്തില്‍ ദുരൂഹത നിലനില്‍ക്കുന്നുണ്ട്. മൃതദേഹങ്ങള്‍ പോസ്റ്റ്‌മോര്‍ട്ടം നടത്തിയതായും ഭക്ഷണത്തിന്റെയും, ആന്തരിക അവയവങ്ങളുടെയും സാമ്പിളുകള്‍ പരിശോധനക്കായി ലാബിലേക്ക് അയച്ചിട്ടുണ്ടെന്നും പൊലിസ് അറിയിച്ചു.  റിപ്പോര്‍ട്ട് വന്നതിന് ശേഷം മാത്രമേ കൂടുതല്‍ വിവരങ്ങള്‍ ലഭ്യമാവൂ.

Four members of a family were found dead under mysterious circumstances in Paydhuni, Mumbai.