തിരുവനന്തപുരം: നിയമസഭ തെരഞ്ഞെടുപ്പിന്റെ എക്‌സിറ്റ് പോള്‍ ഫലങ്ങള്‍ ഇന്ന് പുറത്തുവരും. കേരളത്തില്‍ നിയമസഭാ തെരഞ്ഞെടുപ്പ് കഴിഞ്ഞ് ആഴ്ചകള്‍ പിന്നിട്ടെങ്കിലും, പശ്ചിമ ബംഗാള്‍ അടക്കമുള്ള മറ്റ് സംസ്ഥാനങ്ങളിലെ വോട്ടെടുപ്പ് ഇന്നാണ് പൂര്‍ത്തിയാകുന്നത്.

കഴിഞ്ഞ തെരഞ്ഞെടുപ്പില്‍ എക്‌സിറ്റ് പോള്‍ ഫലം വന്നപ്പോള്‍ ആക്‌സിസ് മൈ ഇന്ത്യ അടക്കമുള്ള ഏജന്‍സികള്‍ എല്‍.ഡി.എഫിനൊപ്പമായിരുന്നു. ആകെ 140 സീറ്റുകളില്‍ എല്‍.ഡി.എഫ് 104 മുതല്‍ 120 വരെ സീറ്റുകള്‍ നേടുമെന്നായിരുന്നു പ്രവചനം.  കോണ്‍ഗ്രസ് നേതൃത്വത്തിലുള്ള യു.ഡി.എഫ് 20 മുതല്‍ 36 വരെ സീറ്റുകള്‍ മാത്രമേ നേടൂ എന്നും പ്രവചിച്ചു. ഫലം പുറത്തുവന്നപ്പോള്‍ 99 സീറ്റുമായി എല്‍.ഡി.എഫ് സര്‍ക്കാര്‍ വീണ്ടും അധികാരത്തിലെത്തി. 

ALSO READ: മന്ത്രിമാരിൽ ആര് വാഴും, വീഴും? ഫലമറിയാൻ ഇനി ആറുനാൾ 

ഇത്തവണയും അതേ ആത്മവിശ്വാസത്തിലാണ് എല്‍.ഡി.എഫ് ക്യാംപ്. മൂന്നാം തവണയും അധികാരത്തിലെത്തുമെന്ന് മുഖ്യമന്ത്രി പിണറായി വിജയന്‍ ആത്മവിശ്വാസം പ്രകടിപ്പിച്ചിരുന്നു.

എന്നാല്‍ ഭരണം തിരിച്ചുപിടിക്കുമെന്ന ഉറച്ച പ്രതീക്ഷയാണ് യു.ഡി.എഫിനുള്ളത്.  വോട്ടെടുപ്പ് കഴിഞ്ഞപ്പോള്‍ തന്നെ യു.ഡി.എഫില്‍ മുഖ്യമന്ത്രി ചര്‍ച്ചകള്‍ സജീവമായിക്കഴിഞ്ഞിട്ടുണ്ട്. തദ്ദേശ തെരഞ്ഞെടുപ്പിലെ അപ്രതീക്ഷിത വിജയം നല്‍കിയ ആത്മവിശ്വാസത്തിലാണ് യു.ഡി.എഫ് ഇത്തവണ നിയമസഭ തെരഞ്ഞെടുപ്പിനിറങ്ങിയത്. 85-ല്‍ പരം സീറ്റുകള്‍ നേടി അധികാരം പിടിക്കുമെന്നും ശക്തമായ ഭരണവിരുദ്ധ തരംഗമുണ്ടായെങ്കില്‍ സീറ്റ് നില 90 കടക്കുമെന്നും യു.ഡി.എഫ് നേതാക്കള്‍ അവകാശപ്പെടുന്നു. 

ഒന്നിലധികം സീറ്റുകള്‍ നേടി തങ്ങളുടെ സാന്നിധ്യം ശക്തമാക്കുമെന്ന പ്രതീക്ഷയിലാണ് ഇത്തവണ ബി.ജെ.പി. കുറഞ്ഞത് മൂന്ന് സീറ്റിലെങ്കിലും വിജയിക്കുമെന്ന് ബിജെപിയും അവകാശവാദമുന്നയിക്കുന്നു. 

ഏപ്രില്‍ ഒമ്പതിനാണ് സംസ്ഥാനത്ത് വോട്ടെടുപ്പ്. ഒറ്റഘട്ടമായി നടന്ന വോട്ടെടുപ്പില്‍ 78 ശതമാനം പോളിങ്ങാണ് രേഖപ്പെടുത്തിയത്. കഴിഞ്ഞ തവണത്തെക്കാള്‍ ഉയര്‍ന്ന പോളിങ് ആയിരുന്നു ഇത്തവണം. മെയ് നാലിനാണ് വോട്ടെണ്ണല്‍. 

exit poll results for the kerala assembly election 2026 will be released today as voting concludes in other states. ldf, udf and bjp camps express confidence ahead of the final results counting on may 4.