തിരുവനന്തപുരം: മില്‍മ പാലിന് വില കൂട്ടാന്‍ തീരുമാനമായി. ലിറ്ററിന് നാല് രൂപ കൂട്ടാനാണ് തീരുമാനം. ഇന്ന് ചേര്‍ന്ന മില്‍മ ഡയറക്ടര്‍ ബോര്‍ഡ് യോഗത്തിലാണ് വില വര്‍ധിപ്പിക്കാനുള്ള തീരുമാനമുണ്ടായത്. തെരഞ്ഞെടുപ്പ് പെരുമാറ്റച്ചട്ടം നിലവിലുള്ളതിനാല്‍ അന്തിമ പ്രഖ്യാപനം ഇന്നുണ്ടായേക്കില്ല. തെരഞ്ഞെടുപ്പ് പെരുമാറ്റച്ചട്ടം നിലനില്‍ക്കുന്നതിനാല്‍ വര്‍ധന നടപ്പാക്കാന്‍ തെരഞ്ഞെടുപ്പ് കമ്മിഷന്റെ അനുമതിയും ആവശ്യമായുണ്ട്.

ലിറ്ററിന് നാല് രൂപ മുതല്‍ ആറ് വരെ കൂട്ടണമെന്നായിരുന്നു മില്‍മ സര്‍ക്കാരിന് നല്‍കിയ ശുപാര്‍ശ. തദ്ദേശ തെരഞ്ഞെടുപ്പിന് മുമ്പാണ് വില വര്‍ധിപ്പിക്കണമെന്ന ആവശ്യവുമായി മില്‍മ സര്‍ക്കാരിനെ സമീപിച്ചത്. തെരഞ്ഞെടുപ്പില്‍ തിരിച്ചടിയുണ്ടാകുമെന്ന വിലയിരുത്തലില്‍ തീരുമാനം വൈകിപ്പിക്കുകയായിരുന്നു. വീണ്ടും മില്‍മ സര്‍ക്കാരിനെ സമീപിച്ചെങ്കിലും നിയമസഭാ തെരഞ്ഞെടുപ്പിന്റെ പശ്ചാത്തലത്തില്‍ അപേക്ഷ സര്‍ക്കാര്‍ നിഷേധിക്കുകയായിരുന്നു.

തെരഞ്ഞെടുപ്പിന് പിന്നാലെ മില്‍മ വീണ്ടും സര്‍ക്കാരിനെ സമീപ്പിക്കുകയായിരുന്നു. ഇതിലാണ് സര്‍ക്കാര്‍ അനുകൂല നിലപാട് സ്വീകരിച്ചിരിക്കുന്നത്. ആറുമാസം മുമ്പാണ് ലിറ്ററിന് നാലു മുതല്‍ ആറ് രൂപ വരെ വര്‍ധിപ്പിക്കണമെന്ന് ബോര്‍ഡ് തീരുമാനമെടുത്തതെന്നും അത് ഉടന്‍ നടപ്പാക്കണമെന്നും ആവശ്യപ്പെട്ട് എറണാകുളം മേഖലാ യൂനിയന്‍ ഭാരവാഹികള്‍ കഴിഞ്ഞ ആഴ്ച പട്ടം മില്‍മ ആസ്ഥാനത്ത് പ്രതിഷേധിച്ചിരുന്നു.

മില്‍മയ്ക്ക് നേരിട്ട് പാല്‍വില കൂട്ടാനുള്ള അധികാരമുണ്ടെന്ന് ഹൈക്കോടതി ഉത്തരവിട്ടിരുന്നെങ്കിലും സര്‍ക്കാരിന്റെ അനുമതിയോടെ മാത്രമേ വിലവര്‍ധന നടപ്പാക്കാനാവൂ എന്നായിരുന്നു ചെയര്‍മാന്റെ നിലപാട്. ഇന്നത്തെ ബോര്‍ഡ് യോഗത്തില്‍ അന്തിമ തീരുമാനമുണ്ടായാല്‍ തെരഞ്ഞെടുപ്പ് കമ്മിഷന്റെ അന്തിമ അനുമതിയോടെ പുതിയ സര്‍ക്കാര്‍ വരുന്നതോടെ വിലവര്‍ധനവ് പ്രാബല്യത്തില്‍ വരും.

The Kerala Cooperative Milk Marketing Federation (Milma) is set to increase milk prices in the state. While the government has reportedly given in-principle approval for a hike of ₹4 per litre, the official announcement has been deferred to avoid violating the Model Code of Conduct currently in place.