വാഷിംഗ്ടൺ: അമേരിക്കൻ പ്രസിഡന്റ് ഡോണൾഡ് ട്രംപിനെ വധിക്കുമെന്ന് ഭീഷണിപ്പെടുത്തിയെന്നാരോപിച്ച് മുൻ എഫ്.ബി.ഐ ഡയറക്ടർ ജെയിംസ് കോമിക്കെതിരെ ട്രംപ് ഭരണകൂടം കേസെടുത്തു. ഇൻസ്റ്റാഗ്രാമിലൂടെ പങ്കുവെച്ച ഒരു പോസ്റ്റാണ് കോമിയെ കുരുക്കിയിരിക്കുന്നത്. വിവാദമായ '86 47' എന്ന സന്ദേശമടങ്ങിയ ചിത്രമാണ് കേസിനാധാരം.

കഴിഞ്ഞ വർഷം നോർത്ത് കരോലിനയിലെ കടൽത്തീരത്ത് നിന്നും കോമി പങ്കുവെച്ച ചിത്രമാണ് വിവാദമായത്. കടൽച്ചിപ്പുകൾ കൊണ്ട് '86 47' എന്ന് എഴുതിയ രൂപമായിരുന്നു ചിത്രത്തിലുണ്ടായിരുന്നത്. അമേരിക്കൻ സംസാരഭാഷയിൽ '86' എന്നത് ഒരാളെ പുറത്താക്കുകയോ അല്ലെങ്കിൽ ഒരാളെ വകവരുത്തുകയോ (Eliminate) ചെയ്യുക എന്നതിന്റെ സൂചനയായാണ് കരുതപ്പെടുന്നത്. ട്രംപ് അമേരിക്കയുടെ 47-ാമത് പ്രസിഡന്റായതിനാൽ, '47-ാമനെ ഇല്ലാതാക്കുക' എന്ന കൊലവിളിയാണ് കോമി ഇതിലൂടെ നടത്തിയതെന്നാണ് ഭരണകൂടത്തിന്റെ വാദം.

പ്രതികരണവുമായി ജെയിംസ് കോമി

താൻ നിരപരാധിയാണെന്നും അക്കങ്ങളുടെ ഗൂഢാർത്ഥം അറിയില്ലായിരുന്നുവെന്നുമാണ് കോമിയുടെ വിശദീകരണം. "ഞാൻ നിരപരാധിയാണ്, എനിക്ക് ഭയമില്ല. സ്വതന്ത്രമായ നീതിന്യായ വ്യവസ്ഥയിൽ ഞാൻ വിശ്വസിക്കുന്നു. ഇതൊരു രാഷ്ട്രീയ സന്ദേശമാണെന്ന് കരുതിയാണ് ചിത്രം പങ്കുവെച്ചത്. അക്രമത്തെ പ്രോത്സാഹിപ്പിക്കാൻ താൻ ആഗ്രഹിക്കുന്നില്ല." എന്നും ജെയിംസ് കോമി വ്യക്തമാക്കി

എഫ്.ബി.ഐ ഡയറക്ടർ പദവിയിലിരുന്ന ഒരാൾക്ക് ഇത്തരം സന്ദേശങ്ങളുടെ പ്രത്യാഘാതം നന്നായി അറിയാമെന്ന് നിലവിലെ എഫ്.ബി.ഐ ഡയറക്ടർ കാഷ് പട്ടേൽ പ്രതികരിച്ചു. കുറ്റം തെളിയിക്കപ്പെട്ടാൽ ഓരോ വകുപ്പിലും പത്ത് വർഷം വരെ തടവുശിക്ഷ ലഭിക്കാവുന്ന കുറ്റങ്ങളാണ് ചുമത്തിയിരിക്കുന്നത്.

അതേസമയം, കേസ് നിലനിൽക്കില്ലെന്നും ഇത് വ്യക്തമായ രാഷ്ട്രീയ വൈരാഗ്യമാണെന്നുമാണ് നിയമവിദഗ്ധരുടെ പക്ഷം. അഭിപ്രായസ്വാതന്ത്ര്യത്തിന്മേലുള്ള കടന്നുകയറ്റമാണിതെന്ന് പലരും നിരീക്ഷിക്കുന്നു. മുൻപ് കോമിക്കെതിരെ നൽകിയ മറ്റൊരു കേസ് കോടതി തള്ളിയിരുന്നു.

ട്രംപിന്റെ ആദ്യ ഭരണകാലത്ത് റഷ്യൻ ഇടപെടലുകളെക്കുറിച്ച് അന്വേഷിച്ചതിനെത്തുടർന്നാണ് കോമിയെ സ്ഥാനത്തുനിന്ന് നീക്കിയിരുന്നു. കോമിയുടെ മകൾ മോറിൻ കോമിയെ ഫെഡറൽ പ്രോസിക്യൂട്ടർ സ്ഥാനത്തുനിന്ന് നീക്കിയതും വലിയ വിവാദമായിരുന്നു. അച്ഛനോടുള്ള രാഷ്ട്രീയ പകപോക്കലാണ് തന്റെ പുറത്താക്കലിന് പിന്നിലെന്ന മോറിന്റെ വാദത്തിൽ നിയമപോരാട്ടം തുടരാൻ കോടതി അനുമതി നൽകിയിട്ടുണ്ട്.

the trump administration has filed a case against former fbi director james comey for allegedly posting a death threat on instagram. the controversy centers on a photo of seashells forming the numbers '86 47'.