ആലപ്പുഴ: കായംകുളത്തെ തോല്‍വിയില്‍ അതൃപ്തി പരസ്യമാക്കി എല്‍.ഡി.എഫ് സ്ഥാനാര്‍ഥി യു. പ്രതിഭ. കായംകുളത്ത് വെള്ളാപ്പള്ളി നടേശന്‍ തനിക്കെതിരെ പ്രവര്‍ത്തിച്ചെന്നും എസ്.എന്‍.ഡി.പി വോട്ടുകളില്‍ ചോര്‍ച്ച ഉണ്ടായെന്നും യു പ്രതിഭ പറഞ്ഞു. 

പാര്‍ട്ടി കേന്ദ്രങ്ങളില്‍ വോട്ട് കുറഞ്ഞെന്നും പത്തിയൂരും ചെട്ടികുളങ്ങരയും ഭൂരിപക്ഷം കുറഞ്ഞത് അമ്പരപ്പുണ്ടാക്കിയെന്നും പ്രതിഭ പറയുന്നു. കഴിഞ്ഞ തവണത്തേത് പോലെ പ്രവര്‍ത്തനം ഊര്‍ജസ്വലമായിരുന്നില്ലെന്നും പ്രതിഭ വിമര്‍ശിക്കുന്നു. 

അതേസമയം, പ്രതിഭയുടെ ആരോപണം സി.പി.എം ജില്ലാ സെക്രട്ടറി ആര്‍. നാസര്‍ നിഷേധിച്ചു. പ്രതിഭ പറയുന്നത് അസംബന്ധമാണെന്നും സഖാക്കള്‍ കായംകുളത്ത് നല്ല രീതിയില്‍ പണിയെടുത്തുവെന്നും നാസര്‍ പറഞ്ഞു. 

തോറ്റു കഴിയുമ്പോള്‍ എന്തും പറയാമെന്നാണോ. ലോക്‌സഭ തെരഞ്ഞെടുപ്പില്‍ മൂന്നാം സ്ഥാനത്ത് പോയപ്പോഴും പ്രതിഭ തന്നെയല്ലേ എം.എല്‍.എ. അപ്പോള്‍ എന്താണ് സംഭവിച്ചത്. ഈഴവ വോട്ടുകള്‍ സാധാരണഗതിയില്‍ പ്രതിഭക്ക് കിട്ടിയിട്ടുണ്ട്. ഈ പ്രാവശ്യം എന്തുകൊണ്ട് വോട്ട് കിട്ടിയില്ലെന്ന് പ്രതിഭ പരിശോധിക്കണം. പ്രതിഭ അതേ സമുദായത്തില്‍ നിന്നുള്ള ആളാണല്ലോയെന്നും അദ്ദേഹം പറഞ്ഞു