വെനീസ്: ആഗോള കലാരംഗത്തെ ഏറ്റവും വലിയ വേദികളിലൊന്നായ വെനീസ് ബിനാലെയിൽ ഇന്ത്യയുടെ സാംസ്കാരിക പൈതൃകം അടയാളപ്പെടുത്തി നിത മുകേഷ് അംബാനി കൾച്ചറൽ സെന്റർ (NMACC). 'Geographies of Distance' എന്ന പ്രമേയത്തിൽ സംഘടിപ്പിച്ച പ്രദർശനത്തിലൂടെ ഇന്ത്യൻ കലയെയും സംസ്‍കാരത്തെയും രാജ്യാന്തര തലത്തിൽ എത്തിക്കുന്നതിൽ നിർണ്ണായക പങ്ക് വഹിച്ചിരിക്കുകയാണ് നിത മുകേഷ് അംബാനി കൾച്ചറൽ സെന്റർ.

പരിപാടിയുടെ ഭാഗമായി നടന്ന ചർച്ചകളിൽ എൻ.എം.എ.സി.സി ഡയറക്ടർ ഇഷ അംബാനി പങ്കെടുത്തു. കല, വ്യക്തിത്വം, അന്യദേശത്തെ ജീവിതം  എന്നീ വിഷയങ്ങളെ ആസ്പദമാക്കി അവർ നടത്തിയ നിരീക്ഷണങ്ങൾ ശ്രദ്ധേയമായി. ഇന്ത്യയുടെ കഥകൾ ലോകത്തിന് മുന്നിൽ അവതരിപ്പിക്കുക എന്ന ലക്ഷ്യത്തോടെയാണ് ഈ ഉദ്യമം ഏറ്റെടുത്തതെന്ന് അവർ വ്യക്തമാക്കി.

"അതിരുകൾ ഭേദിക്കുന്ന കലയിലൂടെ ഇന്ത്യയുടെ സാംസ്കാരിക സംഭാഷണങ്ങൾ ലോകമെമ്പാടും എത്തിക്കുക എന്നതാണ് ഞങ്ങളുടെ ലക്ഷ്യം. ഓർമ്മകളുടെയും സ്വത്വത്തിന്റെയും കഥകളിലൂടെ ഇന്ത്യ വെനീസിലേക്ക് എത്തിയിരിക്കുകയാണ് എന്ന് ചടങ്ങിൽ വച്ച് ഇഷ അംബാനി വ്യക്തമാക്കി.

ഇന്ത്യൻ കലയെ ആഗോള ഭൂപടത്തിൽ അടയാളപ്പെടുത്തുന്നതിൽ റിലയൻസ് ഫൗണ്ടേഷന്റെയും NMACC-യുടെയും ഇടപെടൽ വലിയ ചർച്ചകൾക്കാണ് വെനീസിൽ തുടക്കമിട്ടിരിക്കുന്നത്. സാംസ്കാരിക വിനിമയത്തിലൂടെ രാജ്യങ്ങൾ തമ്മിലുള്ള ബന്ധം സുദൃഢമാക്കാൻ ഇത്തരം വേദികൾ ഉപകരിക്കുമെന്നാണ് കലാനിരൂപകർ വിലയിരുത്തുന്നത്.