ബാഴ്‌സലോണ: ഫുട്ബോൾ ഇതിഹാസം ലയണൽ മെസ്സിക്കൊപ്പം താൻ മാതൃകയാക്കുന്ന താരം സ്പാനിഷ് ഇതിഹാസം ആന്ദ്രേ ഇനിയേസ്റ്റയാണെന്ന് ബാഴ്‌സലോണയുടെ യുവ മിഡ്ഫീൽഡർ ഫെർമിൻ ലോപ്പസ്. മെസ്സിയെയും ഇനിയേസ്റ്റയെയും പോലെ ബാഴ്‌സലോണയുടെ വിഖ്യാതമായ 'ലാ മാസിയ' അക്കാദമിയിലൂടെ വളർന്നുവന്ന താരം, കുട്ടിക്കാലം മുതൽ ഇരുവരെയും ആരാധിച്ചിരുന്നുവെന്ന് വെളിപ്പെടുത്തി.

ഇനിയേസ്റ്റ എന്ന മാന്ത്രികൻ

ഞായറാഴ്ച നടക്കാനിരിക്കുന്ന നിർണ്ണായകമായ 'എൽ ക്ലാസിക്കോ'യ്ക്ക് മുന്നോടിയായി മുണ്ടോ ഡിപോർട്ടീവോയോട് സംസാരിക്കുകയായിരുന്നു 22-കാരനായ ഫെർമിൻ. മെസ്സിയും ഇനിയേസ്റ്റയും തന്റെ കരിയറിലെ വലിയ സ്വാധീനങ്ങളാണെങ്കിലും അവർ കൈവരിച്ച നേട്ടങ്ങൾ ആവർത്തിക്കുക എന്നത് അസാധ്യമായ കാര്യമാണെന്ന് താരം തുറന്നു സമ്മതിക്കുന്നു.

"ആന്ദ്രേ ഇനിയേസ്റ്റയെയും ലിയോ മെസ്സിയെയും ഞാൻ എപ്പോഴും ആദരിച്ചിരുന്നു. കുട്ടിക്കാലം മുതൽ അവരാണ് എന്റെ രണ്ട് റോൾ മോഡലുകൾ. അവർ മൈതാനത്ത് ചെയ്തത് ചെയ്യാൻ പ്രയാസമാണ്, അത് അസാധ്യമാണെന്ന് പോലും ഞാൻ കരുതുന്നു. എങ്കിലും എന്റെ കഴിവിനുള്ളിൽ നിന്ന് ടീമിനെ സഹായിക്കാനാണ് ഞാൻ ശ്രമിക്കുന്നത്," ഫെർമിൻ പറഞ്ഞു.

മിന്നും ഫോമിൽ ഫെർമിൻ

2023-ൽ സാവിയുടെ കീഴിൽ സീനിയർ അരങ്ങേറ്റം കുറിച്ച ഫെർമിൻ ലോപ്പസ് ഇതിനോടകം ക്ലബ്ബിനായി 134 മത്സരങ്ങളിൽ ബൂട്ടുകെട്ടി. ഈ സീസണിൽ ഗംഭീര ഫോമിലാണ് താരം. ഒരു മിഡ്ഫീൽഡറാണെങ്കിലും 13 ഗോളുകളും 17 അസിസ്റ്റുകളും സീസണിൽ താരം സ്വന്തം പേരിൽ കുറിച്ചു. തന്റെ പ്രകടനത്തിൽ പൂർണ്ണ സംതൃപ്തനാണെന്നും താരം കൂട്ടിച്ചേർത്തു.

കിരീടത്തിലേക്ക് ബാഴ്‌സലോണ

ലാലിഗ കിരീടം നിലനിർത്തുന്നതിന് തൊട്ടരികിലാണ് നിലവിൽ ബാഴ്‌സലോണ. 34 മത്സരങ്ങളിൽ നിന്ന് 88 പോയിന്റാണ് ടീമിനുള്ളത്. ഞായറാഴ്ച ക്യാമ്പ് നൗവിൽ നടക്കുന്ന എൽ ക്ലാസിക്കോയിൽ റയൽ മാഡ്രിഡിനെതിരെ തോൽവി ഒഴിവാക്കിയാൽ ബാഴ്‌സലോണയ്ക്ക് ലാലിഗ കിരീടം ഉറപ്പിക്കാം. നിലവിൽ റയൽ മാഡ്രിഡിനേക്കാൾ 11 പോയിന്റ് മുന്നിലാണ് ബാഴ്‌സലോണ.