വാര്‍ഷിക വരുമാനം പത്തുലക്ഷം രൂപയില്‍ കൂടുതലുള്ളവരുടെ പാചകവാതക സബ്‌സിഡി ഉടന്‍തന്നെ പിന്‍വലിച്ചേക്കുമെന്ന് റിപ്പോര്‍ട്ട്. പൊതുമേഖലാ എണ്ണക്കമ്പനികള്‍ ഉപഭോക്തക്കള്‍ക്ക് ഇതുസംബന്ധിച്ച് എസ്.എം.എസ് അയച്ചുതുടങ്ങി. 

അതേസമയം, കേന്ദ്ര സര്‍ക്കാരിന്റെ നിര്‍ദ്ദേശ പ്രകാരമാണ് സന്ദേശങ്ങള്‍ അയക്കുന്നതെന്നും മറ്റ് നിര്‍ദ്ദേശങ്ങളൊന്നും ലഭിച്ചിട്ടില്ലെന്നുമാണ് എണ്ണക്കമ്പനികള്‍ നല്‍കുന്ന വിശദീകരണം.

നേരത്തെ 400 രൂപയുണ്ടായിരുന്ന സബ്‌സിഡി തുക ലോക്ഡൗണ്‍ കാലത്താണ് കുറച്ചത്. 24.50 രൂപയാണ് ഇപ്പോള്‍ സബ്‌സിഡിയായി നല്‍കുന്നത്. ഇത് വരുമാനത്തിനനുസരിച്ച് നിജപ്പെടുത്താനാണ് ഒരുങ്ങുന്നത്. പുതുക്കിയ നിബന്ധനപ്രകാരം കുടുംബത്തിന്റെ വരുമാനം പത്ത് ലക്ഷത്തിന് മുകളിലാണെങ്കില്‍ സബ്‌സിഡി നല്‍കില്ല.

ഇതില്‍ പരാതിയുള്ളവര്‍ക്ക് ടോള്‍ ഫ്രീ നമ്പര്‍ മുഖേനയോ വെബ്‌സൈറ്റ് വഴിയോ 7 ദിവസത്തിനകം പരാതി അറിയിക്കാം. അല്ലാത്തവര്‍ ഇത് അംഗീകരിച്ചതായി കണക്കാക്കുമെന്നാണ് എണ്ണക്കമ്പനികളുടെ സന്ദേശത്തില്‍ പറയുന്നത്. പരാതികള്‍ ബോധിപ്പിക്കാനുള്ള ഒരു ടോള്‍ഫ്രീ നമ്പറും സന്ദേശത്തിനൊപ്പം കമ്പനികള്‍ നല്‍കുന്നുണ്ട്. 

അതേസമയം, തുച്ഛമായ സബ്‌സിഡി തുക അനുവദിക്കുന്നതിനായി ആദായനികുതി വിവരങ്ങള്‍ ഉള്‍പ്പടെ പരിശോധിച്ച എണ്ണകമ്പനികളുടെ നടപടി അംഗീകരിക്കാനാവില്ലെന്ന വിമര്‍ശനവും ഇതിനോടകം ഉയര്‍ന്നിട്ടുണ്ട്. വ്യക്തികളുടെ ആദായനികുതി വിവരങ്ങള്‍ പരിശോധിക്കുന്നത് സ്വകാര്യതയിലേക്കുള്ള കടന്നുകയറ്റമാണെന്ന് ഉപഭോക്തൃ സംരക്ഷണ പ്രവര്‍ത്തകര്‍ ചൂണ്ടിക്കാട്ടുന്നത്.