കൊല്‍ക്കത്ത: ബംഗാള്‍ മുഖ്യമന്ത്രി സുവേന്ദു അധികാരിയുടെ പഴ്‌സണല്‍ അസിസ്റ്റന്റും അടുത്ത സഹായിയുമായ ചന്ദ്രനാഥ് രഥിന്റെ കൊലപാതകവുമായി ബന്ധപ്പെട്ട് മൂന്ന് പേര്‍ അറസ്റ്റില്‍. വിശാല്‍ ശ്രീവാസ്തവ, മായങ്ക് മിശ്ര, വിക്കി മൗര്യ എന്നിവരെയാണ് പശ്ചിമ ബംഗാള്‍ സ്‌പെഷ്യല്‍ ടാസ്‌ക് ഫോഴ്‌സ് പിടികൂടിയത്. കൊലപാതകത്തിനുശേഷം രക്ഷപ്പെട്ട പ്രതികള്‍ കൊല്‍ക്കത്തയ്ക്ക് സമീപമുള്ള ഹൗറയിലെ ബാലി ടോള്‍ പ്ലാസയില്‍ നടത്തിയ യു.പി.ഐ. ഇടപാടാണ് അന്വേഷണത്തില്‍ വഴിത്തിരിവായത്. 

കഴിഞ്ഞ ബുധനാഴ്ച്ച രാത്രിയാണ് ചന്ദ്രനാഥ് രഥ് സഞ്ചരിച്ചിരുന്ന സ്‌കോര്‍പിയോ വാഹനം തടഞ്ഞുനിര്‍ത്തി അക്രമിസംഘം വെടിയുതിര്‍ത്തത്. നാല് ബൈക്കുകളിലായെത്തിയ എട്ടംഗ സംഘമാണ് ആക്രമണം നടത്തിയത്. ചന്ദ്രനാഥിന്റെ നെഞ്ചിലും വയറിലും അടുത്തുനിന്ന് വെടിയേല്‍ക്കുകയായിരുന്നു. ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. വാഹനമോടിച്ചിരുന്ന ഡ്രൈവര്‍ ഗുരുതരാവസ്ഥയില്‍ ചികിത്സയിലാണ്. 

സി.സി.ടി.വി ദൃശ്യങ്ങള്‍ കേന്ദ്രീകരിച്ച് നടത്തിയ പരിശോധനയില്‍ ടോള്‍ പ്ലാസയില്‍ പണമടച്ച കാറിനെയും ഫോണ്‍നമ്പറിനെയും കേന്ദ്രീകരിച്ചാണ് അന്വേഷണസംഘം നീങ്ങിയത്. ടോള്‍ ബൂത്തില്‍ ഇവര്‍ യു.പി.ഐ വഴി പണമടച്ചതാണ് കൊലയാളികളിലേക്കെത്താന്‍ പൊലിസിനെ സഹായിച്ചത്. പിടിയിലായ മൂവരും പ്രൊഫഷണല്‍ കൊലപാതകികളാണെന്ന് പൊലിസ് പറഞ്ഞു. 

പ്രതികള്‍ വ്യാജ നമ്പര്‍ പ്ലേറ്റുള്ള വാഹനങ്ങളാണ് ഉപയോഗിച്ചതെന്നും കൃത്യമായ നിരീക്ഷണത്തിന് ശേഷമാണ് കൊലപാതകം നടത്തിയതെന്നും പൊലിസ് വ്യക്തമാക്കി.

Three suspects have been arrested in connection with the murder of BJP leader Suvendu Adhikari’s personal assistant. The breakthrough in the investigation came through digital footprints; a UPI transaction made by the accused at a toll plaza served as crucial evidence for the police.