ഇ​ടു​ക്കി: കോൺഗ്രസിലെ മുഖ്യമന്ത്രി ചർച്ചകൾ നീണ്ടുപോകുന്നതിനിടെ പരിഹാസവുമായി സി.പി.എം നേതാവ് എം.എം മണി. വന്ന് വന്ന് യു.ഡി.എഫിന് വോട്ട് ചെയ്യാത്ത നമ്മളെയും ഇനി ഡൽഹിക്ക് വിളിപ്പിക്കുമോ എന്നാണ് എം.എം മണി തന്റെ ഫെയ്സ്‌ബുക്ക് പോസ്റ്റിലൂടെ ചോദിച്ചത്. കോൺഗ്രസിനെ ട്രോളുന്ന ചിത്രവും അദ്ദേഹം കുറിപ്പിനൊപ്പം പങ്കുവെച്ചിട്ടുണ്ട്.

അതേസമയം, കേരളത്തിലെ മുഖ്യമന്ത്രിയെ തീരുമാനിക്കുന്നതിനായുള്ള ചർച്ചകൾ ഹൈക്കമാൻഡ് തലത്തിൽ പുരോഗമിക്കുകയാണ്. സോണിയാ ഗാന്ധിയുടെ വസതിയായ 10 ജൻപഥിലാണ് കൂടിക്കാഴ്ച നടക്കുന്നത്. കെ.പി.സി.സി മുൻ അധ്യക്ഷന്മാർ, വർക്കിംഗ് പ്രസിഡന്റുമാർ, അച്ചടക്ക സമിതി അധ്യക്ഷൻ തിരുവഞ്ചൂർ രാധാകൃഷ്ണൻ തുടങ്ങിയ പ്രമുഖ നേതാക്കൾ ചർച്ചകളിൽ പങ്കെടുത്തു.

അതേസമയം, എ.ഐ.സി.സി അധ്യക്ഷൻ മല്ലികാർജുൻ ഖാർഗെ ഡൽഹിയിൽ തിരിച്ചെത്തിയ ശേഷമാകും അന്തിമ പ്രഖ്യാപനം ഉണ്ടാവുക.