മുംബൈ: മഹാരാഷ്ട്രയിലെ സാംഗ്ലിയിൽ ശക്തമായ കാറ്റിനെത്തുടർന്ന് ക്ഷേത്രമതിൽ ഇടിഞ്ഞുവീണ് ആറ് പേർക്ക് ദാരുണാന്ത്യം. ക്ഷേത്രത്തിലെ പഴക്കമേറിയ മതിൽ തകർന്ന് സമീപത്തുണ്ടായിരുന്ന ഭക്തരുടെ മേലേക്ക് പതിക്കുകയായിരുന്നു. അപകടത്തിൽ നിരവധി പേർക്ക് പരുക്കേറ്റിട്ടുണ്ട്. 

കുട്ടികളടക്കം ആറ് പേരാണ് മരിച്ചത്. അപകടസ്ഥലത്ത് വെച്ചും ആശുപത്രിയിലേക്കുള്ള യാത്രാമധ്യേയുമായിരുന്നു മരണം. സംഭവത്തെക്കുച്ച് വിവരമറിഞ്ഞയുടൻ പൊലിസും റവന്യൂ അധികൃതരും സ്ഥലത്തെത്തി രക്ഷാപ്രവർത്തനങ്ങൾക്ക് നേതൃത്വം നൽകി. പരുക്കേറ്റവർ നിലവിൽ ചികിത്സയിലാണ്. മതിലിനുണ്ടായിരുന്ന ബലക്ഷയമാകാം അപകടകാരണമെന്നാണ് പ്രാഥമിക നിഗമനം. സംഭവത്തിൽ പൊലിസ് അന്വേഷണം ആരംഭിച്ചിട്ടുണ്ട്.

ദുരന്തത്തിൽ പ്രധാനമന്ത്രി നരേന്ദ്ര മോദി ദുഃഖം രേഖപ്പെടുത്തി. മരിച്ചവരുടെ കുടുംബാംഗങ്ങളുടെ വേദനയിൽ പങ്കുചേരുന്നതായി അദ്ദേഹം എക്സിൽ കുറിച്ചു. മരിച്ചവരുടെ കുടുംബങ്ങൾക്ക് സർക്കാർ അടിയന്തര ധനസഹായം പ്രഖ്യാപിച്ചേക്കുമെന്നാണ് റിപ്പോർട്ടുകൾ.