നെടുമ്പാശ്ശേരി: രാജ്യാന്തര വിമാനത്താവളത്തിൽനിന്നും  ലക്ഷദ്വീപിലെ വിവിധ ദ്വീപുകളുമായി ബന്ധിപ്പിക്കുന്ന സീപ്ലെയിൻ പാതകൾക്ക് സൗകര്യമൊരുങ്ങുന്നു. ലക്ഷദ്വീപ് കണക്റ്റിവിറ്റിക്കായി ഇന്ന് മുതൽ സിയാൽ സീപ്ലെയിൻ പരീക്ഷണങ്ങൾ നടത്താനാണ് പദ്ധതി. പ്രാദേശിക കണക്റ്റിവിറ്റി മെച്ചപ്പെടുത്തുന്നതിനും ദ്വീപ് ടൂറിസം പ്രോത്സാഹിപ്പിക്കുന്നതിനും ലക്ഷ്യമിട്ടാണ് സീപ്ലെയിൻ സർവിസ് ആരംഭിക്കുന്നത്. ലക്ഷദ്വീപ് ദ്വീപുകളിലേക്ക് സ്ഥിരമായി സീപ്ലെയിൻ സർവിസുകൾ നടത്തുന്നതിനായാണ് ഇന്ന് പരീക്ഷണ പറക്കൽ നടത്തുന്നത്.  സ്കൈഹോപ്പ് എവിയേഷൻ ലിമിറ്റഡിന്റെ ഉടമസ്ഥതയിലുള്ള 20 പേർക്ക് സഞ്ചരിക്കാൻ കഴിയുന്ന സീപ്ലെയിനുകളാണ് സർവിസിന് ഒരുങ്ങുന്നത്. കൊച്ചി– അഗട്ടി– കൽപേനി– കവരത്തി, കൊച്ചി– കാദ്മത്– കിൽത്താൻ– അഗത്തി തുടങ്ങിയ മേഖലകളിലാണ് സർവിസ് നടത്തുക. വിവിധ ദ്വീപുകളിലേക്കായി 12 പരീക്ഷണ പറക്കലുകളാണ് പ്ലാൻ ചെയ്തിരിക്കുന്നത്.  ഡയരക്ടറേറ്റ് ജനറൽ ഓഫ് സിവിൽ ഏവിയേഷൻ (ഡി.ജി.സി.എ), ലക്ഷദ്വീപ്  അഡ്മിനിസ്ട്രേഷൻ, എയർപോർട്ട് അതോറിറ്റി ഓഫ് ഇന്ത്യ എന്നിവയുടെ സഹകരണത്തോടെയാണ് സർവിസ് ആരംഭിക്കുന്നത്. സീപ്ലെയിൻ കണക്റ്റിവിറ്റി ദ്വീപുകളിലേക്കുള്ള പ്രവേശനക്ഷമത ഗണ്യമായി മെച്ചപ്പെടുത്തുന്നതിനൊപ്പം ടൂറിസം, അടിയന്തര കണക്റ്റിവിറ്റി, ലക്ഷദ്വീപിലെ പ്രാദേശിക സാമ്പത്തിക വികസനം എന്നിവ വർദ്ധിപ്പിക്കുന്നതിനും സഹായകരമാകും.