ന്യൂഡല്‍ഹി:  ഞായറാഴ്ച (ഇന്ന്) 22 ലക്ഷത്തിലധികം മെഡിക്കല്‍ വിദ്യാര്‍ത്ഥികള്‍ നീറ്റ് (NEET) പുനഃപരീക്ഷ എഴുതുമ്പോള്‍, അത് അവര്‍ക്ക് മാത്രമല്ല, നാഷണല്‍ ടെസ്റ്റിംഗ് ഏജന്‍സിക്കും (NTA) കേന്ദ്ര സര്‍ക്കാരിനും ഒരുപോലെ പരീക്ഷണഘട്ടമാണെന്ന് നിരീക്ഷകര്‍ പറയുന്നു. കഴിഞ്ഞ മെയ് മാസത്തില്‍ നടന്ന പരീക്ഷയിലെ ചോദ്യപേപ്പര്‍ ചോര്‍ച്ചയുണ്ടാക്കിയ ആഘാതം ചെറുതല്ല. ശക്തമായ വിമര്‍ശനമാണ് ഇതിന്റെ പേരില്‍ കേന്ദ്രവും നാഷണല്‍ ടെസ്റ്റിംഗ് ഏജന്‍സിയും നേരിട്ടത്. അതിനാല്‍ വിദ്യാര്‍ത്ഥികളുടെയും പൊതുജനങ്ങളുടെയും വിശ്വാസം വീണ്ടെടുക്കുന്നതിനായി ഇത്തവണ സാധ്യമായ എല്ലാ സുരക്ഷാ ക്രമീകരണങ്ങളും ഇവര്‍ ഒരുക്കിയിട്ടുണ്ടെന്ന് റിപ്പോര്‍ട്ടുകള്‍ വ്യക്തമാക്കുന്നു. 

ചോദ്യപേപ്പര്‍ ചോര്‍ച്ചയും അതിനെത്തുടര്‍ന്ന് മെയ് മൂന്നിലെ പരീക്ഷ റദ്ദാക്കിയതും രാജ്യവ്യാപകമായ പ്രതിഷേധങ്ങള്‍ക്കും വലിയ ജനരോഷത്തിനും കാരണമായിരുന്നു. വിദ്യാഭ്യാസ മന്ത്രി ധര്‍മ്മേന്ദ്ര പ്രധാന്റെ രാജിക്കായി പോലും ആവശ്യമുയര്‍ന്നു. സംഭവത്തില്‍ കേന്ദ്ര സര്‍ക്കാര്‍ ഖേദം പ്രകടിപ്പിച്ചിരുന്നു. 

ഒരുക്കങ്ങള്‍
ചോദ്യപേപ്പറിന്റെ സുരക്ഷ പൂര്‍ണ്ണമായും ഉറപ്പാക്കുന്നതിനുള്ള നടപടികളുടെ ഭാഗമായി, അവ ഇന്ത്യന്‍ വ്യോമസേനയുടെ സഹായത്തോടെയാണ് പരീക്ഷാ കേന്ദ്രങ്ങളില്‍ എത്തിച്ചത്. പരീക്ഷാ ദിവസം കാര്യങ്ങള്‍ സുഗമമായി നടക്കുന്നുണ്ടെന്ന് ഉറപ്പാക്കാന്‍ പരീക്ഷ നടത്തുന്ന നാഷണല്‍ ടെസ്റ്റിംഗ് ഏജന്‍സി (NTA) ശനിയാഴ്ച രാജ്യവ്യാപകമായി ഒരു മോക്ക് ഡ്രില്ലും  നടത്തിയിരുന്നു.

ALSO READ: നീറ്റ് യുജി പുനഃപരീക്ഷ നാളെ; കര്‍ശന സുരക്ഷാ ക്രമീകരണങ്ങളുമായി എന്‍.ടി.എ

സുരക്ഷാ ക്രമീകരണങ്ങള്‍
ഇന്ത്യയിലെ 551 നഗരങ്ങളിലായി 5,440 കേന്ദ്രങ്ങളിലും വിദേശത്തെ 14 കേന്ദ്രങ്ങളിലും 'സമഗ്രമായ ക്രമീകരണങ്ങള്‍' ചെയ്തിട്ടുണ്ടെന്ന് എന്‍.ടി.എ പറയുന്നു. 

95,000-ത്തിലധികം പരീക്ഷാ ഹാളുകളിലായിട്ടാണ് പരീക്ഷ നടക്കുക. ഓരോ ഹാളിലും സിസിടിവി (CCTV) ക്യാമറകള്‍ സ്ഥാപിച്ചിട്ടുണ്ടെന്നും ഏജന്‍സി അറിയിച്ചു.

'ആകെ 1,38,560 സിസിടിവി ക്യാമറകള്‍ സ്ഥാപിച്ചിട്ടുണ്ട്. ഇതില്‍ നിന്നുള്ള ദൃശ്യങ്ങള്‍ ദേശീയ, സംസ്ഥാന, മന്ത്രാലയ തലങ്ങളില്‍ തത്സമയം നിരീക്ഷിക്കും. ഇലക്ട്രോണിക് ഉപകരണങ്ങള്‍ വഴിയുള്ള ക്രമക്കേടുകള്‍ തടയുന്നതിനായി 51,311 ജാമറുകളും വിന്യസിച്ചിട്ടുണ്ട്,' ഏജന്‍സി പ്രസ്താവനയില്‍ പറഞ്ഞു.

ഗതാഗത-വിതരണ സൗകര്യങ്ങള്‍ യാതൊരു തടസ്സവുമില്ലാതെ കൈകാര്യം ചെയ്യാന്‍ സംസ്ഥാന-ജില്ലാ ഭരണകൂടങ്ങളെ സജ്ജമാക്കിയിട്ടുണ്ടെന്നും പൊലിസ്, അര്‍ദ്ധസൈനിക വിഭാഗങ്ങള്‍, ഇന്ത്യന്‍ വ്യോമസേന, തപാല്‍ വകുപ്പ് എന്നിവരെ വിന്യസിച്ചിട്ടുണ്ടെന്നും എന്‍.ടി.എ വ്യക്തമാക്കി.

പരീക്ഷാ സമയം:
പുനഃപരീക്ഷ ഉച്ചയ്ക്ക് 2 മണി മുതല്‍ വൈകുന്നേരം 5.15 വരെയായിരിക്കും നടക്കുക. അധിക സമയത്തിന് അര്‍ഹതയുള്ള ഭിന്നശേഷിക്കാരായ ഉദ്യോഗാര്‍ത്ഥികള്‍ക്ക് വൈകുന്നേരം 6.20 വരെ സമയം അനുവദിക്കും.