ന്യൂഡല്‍ഹി: നീറ്റ് പരീക്ഷ നടത്തിപ്പുമായി ബന്ധപ്പെട്ട ക്രമക്കേടുകളില്‍ സുപ്രീംകോടതി ഇടപെടല്‍ ആവശ്യപ്പെട്ട് ഹരജി. നാഷണല്‍ ടെസ്റ്റിങ് ഏജന്‍സിയായ എന്‍.ടി.എ പിരിച്ചുവിടണമെന്നും പാര്‍ലമെന്റ് നിയമത്തിലൂടെ പുതിയ സ്റ്റാറ്റിയൂട്ടറി നാഷണല്‍ ടെസ്റ്റിങ് ബോഡി രൂപീകരിക്കാന്‍ കേന്ദ്രത്തോട് നിര്‍ദേശിക്കണമെന്നും ഹരജിയില്‍ ആവശ്യപ്പെട്ടു.

ഇന്ത്യയിലെ ഡോക്ടര്‍മാരുടെയും മെഡിക്കല്‍ വിദ്യാര്‍ഥികളുടെയും അവകാശങ്ങള്‍ക്കായി പ്രവര്‍ത്തിക്കുന്ന ദേശീയ സംഘടനയായ യുണൈറ്റഡ് ഡോക്ടേഴ്സ് ഫ്രണ്ടാണ് സുപ്രീംകോടതിയെ സമീപിച്ചത്.

നീറ്റ് യു.ജി 2026 പരീക്ഷ നടത്തിപ്പില്‍ എന്‍.ടി.എ 'വ്യവസ്ഥാപരമായി പരാജയപ്പെട്ടുവെന്ന്' ഹരജിയില്‍ ആരോപിക്കുന്നു. ദേശീയ പ്രവേശന പരീക്ഷകളുടെ വിശ്വാസ്യത തകര്‍ക്കുന്ന രീതിയിലുള്ള ആവര്‍ത്തിച്ചുള്ള വീഴ്ചകളില്‍ അടിയന്തര ജുഡീഷ്യല്‍ ഇടപെടല്‍ വേണമെന്നും സംഘടന ആവശ്യപ്പെട്ടു.

ALSO READ: നീറ്റ് പരീക്ഷ ഇനി ഓണ്‍ലൈനായി; 2027 മുതല്‍ പുതിയ സംവിധാനവുമായി കേന്ദ്ര സര്‍ക്കാര്‍ 

എന്‍.ടി.എയ്ക്ക് പകരമായി കൂടുതല്‍ സുതാര്യവും ഉത്തരവാദിത്തപരവുമായ പുതിയ സംവിധാനം ഒരുക്കാന്‍ കേന്ദ്ര സര്‍ക്കാരിന് നിര്‍ദേശം നല്‍കണമെന്നും ഹരജിയില്‍ പറയുന്നു. ഇനി നടക്കാനിരിക്കുന്ന ദേശീയ പരീക്ഷകള്‍ ചോര്‍ച്ചയില്ലാതെ നടത്തുന്നത് ഉറപ്പാക്കാന്‍ സുപ്രീംകോടതിയുടെ മേല്‍നോട്ടത്തില്‍ പ്രത്യേക സമിതി രൂപീകരിക്കണമെന്നും ആവശ്യപ്പെട്ടിട്ടുണ്ട്.

22.7 ലക്ഷത്തിലധികം വിദ്യാര്‍ഥികളുടെ ഭാവിയെ ബാധിക്കുന്ന പരീക്ഷയാണ് നീറ്റ്. പരീക്ഷ നടത്തിപ്പില്‍ ആവര്‍ത്തിച്ച് ഉണ്ടാകുന്ന വീഴ്ചകള്‍ വിദ്യാര്‍ഥികളുടെ മൗലികാവകാശങ്ങളുടെ ലംഘനമാണെന്നും ഹരജിയില്‍ ചൂണ്ടിക്കാട്ടുന്നു.