അബുദബി: അൽ ദഫ്ര മേഖലയിലുള്ള ബറാക്ക ആണവനിലയത്തിന് സമീപം ഡ്രോൺ ആക്രമണത്തെ തുടർന്ന് തീപിടുത്തമുണ്ടായതായി അബുദബി സർക്കാർ. ആണവനിലയത്തിന്റെ ഉൾവശത്തുള്ള വൈദ്യുത ജനറേറ്ററിനാണ് തീപിടിച്ചത്. സംഭവത്തെ തുടർന്ന് സ്ഥലത്ത് അടിയന്തര സുരക്ഷാ നടപടികൾ സ്വീകരിച്ചതായും നിലവിൽ സ്ഥിതിഗതികൾ പൂർണ്ണ നിയന്ത്രണത്തിലാണെന്നും ഔദ്യോഗിക വൃത്തങ്ങൾ അറിയിച്ചു.

ആക്രമണത്തിൽ ആർക്കും പരുക്കേറ്റിട്ടില്ല. പ്ലാന്റിന്റെ സുരക്ഷയെയോ ഇവിടുത്തെ റേഡിയോളജിക്കൽ സുരക്ഷാ മാനദണ്ഡങ്ങളെയോ ഈ സംഭവം ഒരു തരത്തിലും ബാധിച്ചിട്ടില്ലെന്ന് ഉദ്യോഗസ്ഥർ വ്യക്തമാക്കി. ജനറേറ്ററിന് തീപിടിച്ച ഉടൻ തന്നെ സുരക്ഷാ വിഭാഗം ഇടപെട്ട് മുൻകരുതൽ നടപടികൾ സ്വീകരിച്ചിട്ടുണ്ട്.

രാജ്യത്തെ ആണവ കാര്യങ്ങൾ നിയന്ത്രിക്കുന്ന ഫെഡറൽ അതോറിറ്റി ഫോർ ന്യൂക്ലിയർ റെഗുലേഷൻ (FANR) പ്ലാന്റിന്റെ സുരക്ഷ ഉറപ്പാക്കിക്കൊണ്ട് രംഗത്തെത്തിയിട്ടുണ്ട്. ആണവനിലയത്തിന്റെ സുരക്ഷയെയോ അതിന്റെ പ്രധാന പ്രവർത്തന സംവിധാനങ്ങളെയോ ഈ അപകടം ബാധിച്ചിട്ടില്ലെന്ന് അവർ വ്യക്തമാക്കി. നിലയത്തിലെ എല്ലാ യൂണിറ്റുകളും യാതൊരു തടസ്സവുമില്ലാതെ സാധാരണ നിലയിൽ തന്നെയാണ് ഇപ്പോൾ പ്രവർത്തിക്കുന്നത്.

സംഭവവുമായി ബന്ധപ്പെട്ട് കൂടുതൽ വിവരങ്ങൾ ലഭ്യമാകുന്ന മുറയ്ക്ക് പൊതുജനങ്ങളെ അറിയിക്കുമെന്ന് അധികൃതർ വ്യക്തമാക്കിയിട്ടുണ്ട്. അതേസമയം, ഇത്തരം അടിയന്തര സാഹചര്യങ്ങളിൽ സോഷ്യൽ മീഡിയ വഴിയും മറ്റും വ്യാജവാർത്തകളും കിംവദന്തികളും പ്രചരിപ്പിക്കരുതെന്ന് ഉദ്യോഗസ്ഥർ കർശന നിർദ്ദേശം നൽകി.

ഔദ്യോഗികമായി സ്ഥിരീകരിച്ച വാർത്താ സ്രോതസ്സുകളെ മാത്രം പൊതുജനങ്ങൾ ആശ്രയിക്കണമെന്നും അനാവശ്യ ഭീതി പരത്തുന്ന റിപ്പോർട്ടുകൾ തള്ളിക്കളയണമെന്നും അബുദബി ഭരണകൂടം അഭ്യർത്ഥിച്ചു. നിലവിൽ ആശങ്കപ്പെടേണ്ട യാതൊരു സാഹചര്യവുമില്ലെന്നും സുരക്ഷാ സജ്ജീകരണങ്ങൾ ശക്തമാണെന്നും അധികൃതർ കൂട്ടിച്ചേർത്തു.

ALSO READ: ചൊവ്വ, ഛിന്നഗ്രഹ പര്യവേക്ഷണത്തിന് 44 ബില്യണ്‍ ദിര്‍ഹത്തിന്റെ വന്‍ നിക്ഷേപവുമായി യു.എ.ഇ

ALSO READ: ആളറിഞ്ഞു ട്രോളുക, യു.എ.ഇയിൽ ചൊറിയൻ കമന്റുകൾക്ക് വലിയ വില നൽകേണ്ടിവരും; ഒരു കോടി രൂപ വരെ പിഴ കിട്ടും | UAE Social Media Law

drone activity reported near barakah nuclear power plant in abu dhabi triggered a generator fire, authorities said. officials confirmed the plant remains fully secure, operations unaffected, and emergency teams quickly brought the situation under control.