തിരുവന്തപുരം:  തിരുവനന്തപുരം മെഡിക്കല്‍ കോളജില്‍ ചികിത്സാ പിഴവിനെ തുടര്‍ന്ന് മരിച്ച കൊല്ലം സ്വദേശിയും ഓട്ടോ ഡ്രൈവറുമായിരുന്ന വേണുവിന്റെ കുടുംബത്തിന് അഞ്ച് ലക്ഷം രൂപ ധനസഹായം പ്രഖ്യാപിച്ച് സംസ്ഥാന സര്‍ക്കാര്‍. 

പ്രത്യേക കേസായി പരിഗണിച്ചുകൊണ്ടാണ് സാമ്പത്തിക സഹായത്തിന് അനുമതി നല്‍കിയതെന്ന് മുഖ്യമന്ത്രി വി.ഡി. സതീശന്‍ അറിയിച്ചു. ചികിത്സ പിഴവ് സംഭവിച്ചതായി റിപ്പോര്‍ട്ട് വന്നിട്ടുണ്ടെന്നും വി.ഡി. സതീശന്‍ പറഞ്ഞു. 

ഹൃദയാഘാതത്തെ തുടര്‍ന്ന് 2025 നവംബര്‍ 1നാണ് വേണുവിനെ അടിയന്തര ചികിത്സയ്ക്കായി ആശുപത്രിയില്‍ പ്രവേശിപ്പിച്ചത്.

അടിയന്തര ആന്‍ജിയോഗ്രാം ചെയ്യേണ്ടതുണ്ടായിരുന്നിട്ടും അഞ്ചുദിവസത്തോളം ചികിത്സ നല്‍കാതെ ആശുപത്രിയില്‍ കിടത്തിയതായി കുടുംബം പരാതിപ്പെട്ടിരുന്നു. മരിക്കുന്നതിന് തൊട്ടുമുമ്പ് വേണു സുഹൃത്തിന് അയച്ച ശബ്ദസന്ദേശം ഏറെ വിവാദമായിരുന്നു.

ആദ്യം ചികിത്സാ പിഴവുകള്‍ നിഷേധിച്ചുകൊണ്ട് മെഡിക്കല്‍ കോളജ് അധികൃതര്‍ രംഗത്തെത്തിയിരുന്നു. മെഡിക്കല്‍ വിദ്യാഭ്യാസ ഡയറക്ടര്‍ നടത്തിയ അന്വേഷണത്തില്‍ കൊല്ലം ജില്ലാ ആശുപത്രി മുതല്‍ തിരുവനന്തപുരം മെഡിക്കല്‍ കോളജ് വരെയുള്ള വിവിധ ആശുപത്രികള്‍ക്കും ജീവനക്കാര്‍ക്കും വീഴ്ച സംഭവിച്ചതായി കണ്ടെത്തിയിരുന്നു.