നെടുമ്പാശ്ശേരി: പരിശുദ്ധ ഹജ്ജ് കര്‍മ്മം പൂര്‍ത്തിയാക്കി മലയാളികളുടെ ആദ്യ സംഘം നെടുമ്പാശ്ശേരി അന്താരാഷ്ട്ര വിമാനത്താവളത്തില്‍ മടങ്ങിയെത്തി. സ്വകാര്യ ഹജ്ജ് ഗ്രൂപ്പ് വഴി യാത്രയായവരാണ് ആദ്യ സംഘത്തില്‍ നാട്ടില്‍ തിരിച്ചെത്തിയത്.
ഇന്നലെ രാത്രി 7.30 ന് ജിദ്ദയില്‍ നിന്നും അബുദാബി വഴി നെടുമ്പാശ്ശേരിയിലെത്തിയ ഇത്തിഹാദ് വിമാനത്തിലാണ് ഇവര്‍ എത്തിയത്.
കോഴിക്കോട്, കണ്ണുര്‍, കാസര്‍കോട് ജില്ലകളില്‍ നിന്നുള്ള ഹാജിമാരാണ് മടങ്ങിയെത്തിയവരില്‍ അധികവും.50 ഹാജിമാരാണ് ഇന്നലെ മടങ്ങിയെത്തിയ സംഘത്തില്‍ ഉണ്ടായിരുന്നത്.96 പേരാണ് ഈ സംഘത്തില്‍ യാത്രയായിരുന്നത്.
ബാക്കിയുള്ളവര്‍ ജോലി ആവശ്യാര്‍ത്ഥം അബുദാബിയില്‍ തങ്ങുകയായിരുന്നു. ഓഗസ്റ്റ് 20 ന് നെടുമ്പാശ്ശേരിയില്‍ നിന്നുമാണ് ഇവര്‍ മക്കയിലേക്ക് പുറപ്പെട്ടിരുന്നത്. ഹജ്ജ് കര്‍മ്മം സുഗമമായി പൂര്‍ത്തിയാക്കാന്‍ കഴിഞ്ഞതായി തലശ്ശേരി ചോക്ലി സ്വദേശിയായ ഖാദര്‍ പറഞ്ഞു.
ഭാര്യ ആരിഫയോടൊപ്പമാണ് ഇദ്ധേഹം യാത്രയായിരുന്നത്. അറഫ, മിന, മുസ്തലിഫ എന്നിവിടങ്ങളിലും ജംറയിലെ കല്ലേറിലും യാതൊരു ബുദ്ധിമുട്ടും സംസ്ഥാനത്ത് നിന്നുള്ള ഹാജിമാര്‍ക്ക് നേരിടേണ്ടി വന്നില്ലെന്നും ഇരുവരും പറഞ്ഞു.5600 പേരാണ് സ്വകാര്യ ഹജ്ജ് ഗ്രൂപ്പുകള്‍ വഴി ഈ വര്‍ഷം ഹജ്ജ് കര്‍മ്മം നിര്‍വഹിക്കാന്‍ സംസ്ഥാനത്ത് നിന്നും യാത്രയായിരുന്നത്. ബാക്കിയുള്ളവര്‍ അടുത്ത ദിവസങ്ങളിലായി നാട്ടിലെത്തും.സംസ്ഥാന ഹജ്ജ് കമ്മിറ്റി വഴി യാത്ര പുറപ്പെട്ട തീര്‍ഥാടകരുടെ ആദ്യ സംഘം ഈ മാസം 29 നാണ് നെടുമ്പാശ്ശേരി അന്താരാഷ്ട്ര വിമാനത്താവളത്തില്‍ മടങ്ങിയെത്തുന്നത്.