പത്താന്‍കോട്ട്: ദേശീയപാതയില്‍ സിസിടിവി സ്ഥാപിച്ച് ഇന്ത്യന്‍ സൈന്യത്തിന്റെ നീക്കങ്ങള്‍ പാകിസ്താന് ചോര്‍ത്തി നല്‍കിയ യുവാവ് പിടിയില്‍. പത്താന്‍കോട്ടിലെ ചക്ക് ധരിവാള്‍ നിവാസിയായ ബിട്ടു എന്ന ബല്‍ജിത് സിങ്ങാണ് അന്വേഷണ സംഘത്തിന്റെ പിടിയിലായത്. അതിര്‍ത്തി പ്രദേശമായ പഞ്ചാബിലെ ഇന്ത്യന്‍ സൈന്യത്തെയും, അര്‍ധ സൈനിക നീക്കങ്ങളെയും കുറിച്ചുള്ള തന്ത്രപ്രധാനമായ വിവരങ്ങള്‍ ചോര്‍ത്തിയെന്നാണ് കേസ്. 

ദേശീയപാത 44ലെ പത്താന്‍കോട്ട്-ജമ്മു സ്‌ട്രെച്ചിലെ പാലത്തിന് സമീപമുള്ള ഒരു കടയില്‍ സിസിടിവി സ്ഥാപിച്ചിരുന്നുവെന്ന് പൊലിസ് പറയുന്നു. നിരീക്ഷണ ദൃശ്യങ്ങള്‍ ഇലക്ട്രോണിക് സംവിധാനങ്ങള്‍ വഴി പാകിസ്താനിലും, വിദേശത്തുമുള്ള ഓപ്പറേറ്റീവുകള്‍ക്ക് കൈമാറിയിരുന്നതായി മുതിര്‍ന്ന ഉദ്യോഗസ്ഥനായ ദല്‍ജീന്ദര്‍ സിങ് ധില്ലന്‍ പറഞ്ഞു. 

ചോദ്യം ചെയ്യലിനിടെ ജനുവരിയില്‍ സുജാന്‍പൂരിനടുത്തുള്ള ഹൈവേയിലെ ഒരു കടയില്‍ താന്‍ ഇന്റര്‍നെറ്റ് അധിഷ്ഠിത സിസിടിവ ക്യാമറ സ്ഥാപിച്ചിരുന്നതായി പ്രതി സമ്മതിച്ചു. ദുബൈയില്‍ നിന്നുള്ള അജ്ഞാതനില്‍ നിന്ന് ഇയാള്‍ക്ക് നിര്‍ദേശങ്ങള്‍ ലഭിച്ചിരുന്നു. ഇതിനായി 40,000 രൂപയും കൈപ്പറ്റിയിരുന്നു. ബിട്ടുവിന്റെ പക്കല്‍ നിന്ന് സിസിടിവി ക്യാമറയും ഇന്റര്‍നെറ്റ് വൈഫൈ റൂട്ടറും കണ്ടെടുത്തിട്ടുണ്ട്. 

ഇയാള്‍ക്ക് പുറമെ വിക്രംജിത് സിങ്, ബല്‍വീന്ദര്‍ സിങ്, തരണ്‍പ്രീത് സിങ് എന്നിവര്‍ക്കെതിരെയും സുജന്‍പൂര്‍ പൊലിസ് കേസ് ഫയല്‍ ചെയ്തു. വിശദമായ റിപ്പോര്‍ട്ട് മുതിര്‍ന്ന അധികാരികള്‍ക്ക് അയച്ചതായും, ചാരവൃത്തിയുടെ ഉറവിടം കണ്ടെത്തുന്നതിനായി അന്വേഷണം പുരോഗമിക്കുകയാണെന്നും പൊലിസ് അറിയിച്ചു.

Spying by installing CCTV cameras on the national highway; a case has been registered against four people for allegedly leaking information to Pakistan.