മസ്കത്ത്: മൂന്ന് സുപ്രധാന രാജകീയ ഉത്തരവുകൾ പുറപ്പെടുവിച്ച് സുൽത്താൻ ഹൈതം ബിൻ താരിഖ്. നഗരാസൂത്രണം, കായികം, ആരോഗ്യ മേഖല എന്നിങ്ങനെ നാല് പുതിയ നിയമങ്ങൾക്കാണ് സുൽത്താൻ അനുമതി നൽകിയിരിക്കുന്നത്. രാജ്യത്തെ നഗരാസൂത്രണ രംഗത്ത് വലിയ മാറ്റങ്ങൾ ലക്ഷ്യമിട്ടുള്ളതാണ് ഒന്നാമത്തെ ഉത്തരവ്. ഇതുപ്രകാരം പുതിയ നഗരാസൂത്രണ നിയമത്തിലെ വ്യവസ്ഥകൾ ഉടനടി പ്രാബല്യത്തിൽ വരും. ഇതുസംബന്ധിച്ച ചട്ടങ്ങളും തീരുമാനങ്ങളും ഹൗസിങ്-നഗരാസൂത്രണ മന്ത്രി പുറപ്പെടുവിക്കും. ഇതോടെ മുൻകാല നിയമങ്ങൾ റദ്ദാക്കപ്പെടും. ഔദ്യോഗിക ഗസറ്റിൽ പ്രസിദ്ധീകരിക്കുന്നതിന്റെ തൊട്ടടുത്ത ദിവസം മുതലാണ് നിയമം നിലവിൽ വരിക. രണ്ടാമതായി അനുമതി നൽകിയിരിക്കുന്നത് സ്പോർട്സ് ബോഡീസ് നിയമത്തിനാണ്. കായിക രം​ഗത്തെ കാര്യക്ഷമത വർധിപ്പിക്കാൻ ലക്ഷ്യമിട്ടാണ് പുതിയ നിയമത്തിന് അം​ഗീകാരം നൽകിയിരിക്കുന്നത്.

ALSO READ: തൊഴിലാളികളുടെ അവകാശ സംരക്ഷണം; ബലിപെരുന്നാള്‍ മുന്നില്‍ക്കണ്ട് ശമ്പള വിതരണം വേഗത്തിലാക്കാന്‍ തൊഴില്‍ മന്ത്രാലയ നിര്‍ദേശം

രാജ്യത്തെ എല്ലാ കായിക സംഘടനകൾക്കും ഈ നിയമം ബാധകമായിരിക്കും. ഇതുപ്രകാരം ഒരു വർഷത്തിനകം പുതിയ നിയമത്തിന് അനുസൃതമായി തങ്ങളുടെ ഘടന കായിക സംഘങ്ങൾ മാറ്റേണ്ടതുണ്ട്. ഹയർ ഇൻസ്റ്റിറ്റ്യൂട്ട് ഓഫ് ഹെൽത്ത് സ്പെഷ്യാലിറ്റീസ് നിർത്തലാക്കിയതാണ് മൂന്നാമത്തെ ഉത്തരവ്. ആരോഗ്യ വിദ്യാഭ്യാസ രംഗത്തെ കാര്യക്ഷമത വർധിപ്പിക്കുന്നതിന്റെ ഭാഗമായാണ് ഈ ഉത്തരവ്. ഈ ഇൻസ്റ്റിറ്റ്യൂട്ടിന്റെ കീഴിലുള്ള എല്ലാ കോഴ്സുകളും, ആസ്തികളും, അവകാശങ്ങളും, രേഖകളും ഇനി മുതൽ ഒമാൻ മെഡിക്കൽ സ്പെഷ്യാലിറ്റി ബോർഡിന്റെ കീഴിലാകും. ഇൻസ്റ്റിറ്റ്യൂട്ടിലെ അധ്യാപകരെയും ജീവനക്കാരെയും അവരുടെ നിലവിലെ സേവന-ശമ്പള വ്യവസ്ഥകളോടെ ഒമാൻ മെഡിക്കൽ സ്പെഷ്യാലിറ്റി ബോർഡിലേക്ക് മാറ്റും. നിലവിൽ ഇവിടെ പഠിച്ചുകൊണ്ടിരിക്കുന്ന വിദ്യാർഥികൾക്ക് കോഴ്സ് പൂർത്തിയാകുന്നത് വരെ പഠനം തുടരാം. 

His Majesty Sultan Haitham bin Tarik issues three milestone Royal Decrees reforming Oman's urban planning, sports regulations, and health specialty education sectors.