കൊല്‍ക്കത്ത: സനാതന ധര്‍മ്മത്തെ അപകീര്‍ത്തിപ്പെടുത്തിയെന്ന ആരോപണത്തില്‍ പശ്ചിമ ബംഗാള്‍ മുന്‍ മുഖ്യമന്ത്രി മമത ബാനര്‍ജിക്കെതിരെ കേസ്. 2025ലെ ഈദ് ആഘോഷ പരിപാടിക്കിടെ സനാതന ധര്‍മ്മത്തെ അപകീര്‍ത്തിപ്പെടുത്തി സംസാരിച്ചെന്നാണ് ആരോപണം. ഭാരതീയ ന്യായ സംഹിതയിലെ വിവിധ വകുപ്പുകള്‍ ചുമത്തി സിലിഗുരി സൈബര്‍ പൊലിസാണ് കേസ് രജിസ്റ്റര്‍ ചെയ്തത്. 

സനാതന ധര്‍മ്മത്തെ 'ഗന്താ ധര്‍മ്മ' (വൃത്തിക്കെട്ടി മതം) എന്ന് മമത വിശേഷിപ്പിച്ചെന്ന് ആരോപിച്ച് അഡ്വക്കേറ്റ് റിങ്കി ചാറ്റര്‍ജിയെന്നയാളാണ് പരാതി നല്‍കിയത്. പരാമര്‍ശം വിശ്വാസികളുടെ വികാരത്തെ വ്രണപ്പെടുത്തിയെന്നും, സമൂഹത്തില്‍ വര്‍ഗീയ ഭിന്നത ഉണ്ടക്കാന്‍ കാരണമായെന്നും പരാതിയില്‍ പറയുന്നു. 

ALSO READ: പ്രതിപക്ഷ നേതാവ് പിണറായി വിജയന്റെ വീട്ടിൽ ഇ.ഡി റെയ്ഡ് 

കൂടാതെ നിയമസഭാ തെരഞ്ഞെടുപ്പ് പ്രചരണ വേളയില്‍ മമത ബാനര്‍ജി പ്രകോപനപരമായ പ്രസ്താവനകള്‍ നടത്തിയതായും, എഫ്.ഐ.ആറില്‍ ആരോപണമുണ്ട്. സംഭവത്തില്‍ ബംഗാള്‍ മുഖ്യമന്ത്രി സുവേന്ദു അധികാരിയും മമതക്കെതിരെ രംഗത്തെത്തി. മമതയുടേത് വെറുമൊരു ഈദ് പ്രസംഗമായിരുന്നില്ലെന്നും, കൃത്യമായ രാഷ്ട്രീയ അജണ്ടയുടെ ഭാഗമായിരുന്നെന്നുമാണ് സുവേന്ദുവിന്റെ പ്രതികരണം.