ധാക്ക: ബംഗ്ലാദേശിലെ ഒരു സ്വകാര്യ ആശുപത്രിയില്‍ മണിക്കൂറുകളുടെ വ്യത്യാസത്തില്‍ മരണപ്പെട്ടത് 6 നവജാതശിശുക്കള്‍. അദ്ദിന്‍ ആശുപത്രി വാര്‍ഡിലാണ് സംഭവം. ജനിച്ച് ഒരു ദിവസം മുതല്‍ മൂന്നുദിവസം വരെ പ്രായമുള്ള കുഞ്ഞുങ്ങളാണ് മരിച്ചത്. എസി ഓഫാക്കിയതിനു പിന്നാലെ കുട്ടികള്‍ക്ക് അസ്വസ്ഥതയുണ്ടാവുകയും മരിക്കുകയുമായിരുന്നു. 

പുലര്‍ച്ചെ 2 മണിയോടെ വാര്‍ഡിലെ ഒരു കൂട്ടിരിപ്പുകാരന്‍ പരാതിപ്പെട്ടതിനെ തുടര്‍ന്ന് ആ മുറിയിലെ എസി ഏകദേശം ഒരു മണിക്കൂറോളം ഓഫാക്കിയിരുന്നു. പിന്നീട് ചൂട് അനുഭവപ്പെട്ടതോടെ എസി വീണ്ടും പ്രവര്‍ത്തിപ്പിച്ചു. പിന്നാലെ ആറ് മണിയോടെ ആദ്യത്തെ കുട്ടിക്ക് അസ്വസ്ഥത അനുഭവപ്പെട്ടു. കുഞ്ഞിനെ എന്‍.ഐ.സിയുവിലേക്ക് മാറ്റിയെങ്കിലും മരിച്ചു. പിന്നാലെ മറ്റ് കുട്ടികള്‍ക്കും സുഖമില്ലാതായി. ഇവരെ ആദ്യം എന്‍.ഐ.സിയുവിലും പിന്നീട് വെന്റിലേറ്ററിലേക്കും പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല.

സംഭവം നടക്കുമ്പോള്‍ ധാക്കയിലെ താപനില ഏകദേശം 32 ഡിഗ്രി സെല്‍ഷ്യസ് ആയിരുന്നു. എസി ഓഫ് ചെയ്തതോടെ മുറിക്കുള്ളിലേക്ക് വായുസഞ്ചാരത്തിനുള്ള മറ്റു വഴികളുണ്ടായിരുന്നില്ല. എസിക്കുണ്ടായ സാങ്കേതിക തകരാറിനെത്തുടര്‍ന്ന് വാതക ചോര്‍ച്ചയുണ്ടായിരിക്കാമെന്നാണ് പ്രാഥമിക നിഗമനം. കുട്ടികളുടെ ആരോഗ്യനില വഷളാകാന്‍ കാരണമിതാണെന്ന്  അന്വേഷണത്തില്‍ റിപ്പോര്‍ട്ട് ചെയ്യപ്പെട്ടിരുന്നു. സംഭവത്തെക്കുറിച്ച് അന്വേഷിക്കാന്‍ ആരോഗ്യ മന്ത്രാലയത്തിലെ ജോയിന്റ് സെക്രട്ടറിയുടെ നേതൃത്വത്തില്‍ മൂന്നംഗ അന്വേഷണ സമിതിയെ രൂപീകരിച്ചു. മൂന്ന് ദിവസത്തിനുള്ളില്‍ റിപ്പോര്‍ട്ട് സമര്‍പ്പിക്കണമെന്നാണ് നിര്‍ദ്ദേശം നല്‍കിയിരിക്കുന്നത്.