ബംഗളുരു: മുഖ്യമന്ത്രിപദം രാജിവെക്കുകയാണെന്ന് മന്ത്രിസഭാംഗങ്ങളെ അറിയിച്ച് കെ.സിദ്ധരാമയ്യ. ഔദ്യോഗിക വസതിയായ കാവേരിയില്‍ ഒരുക്കിയ പ്രഭാത ഭക്ഷണ വിരുന്നിനിടെയാണ് പ്രഖ്യാപനം നടത്തിയത്. നിലവില്‍ ഉപമുഖ്യമന്ത്രിയായ ഡി.കെ. ശിവകുമാര്‍ മുഖ്യമന്ത്രിസ്ഥാനം ഏറ്റെടുക്കുന്നതിന് ഇനി ഔദ്യോഗിക നടപടി ക്രമങ്ങള്‍ മാത്രമേ ബാക്കിയുള്ളൂ.

രാജി സമര്‍പ്പിക്കുന്നതിനായി സിദ്ധരാമയ്യ ഉച്ചയ്ക്ക് ശേഷം ഗവര്‍ണര്‍ താവര്‍ചന്ദ് ഗെഹ്ലോട്ടുമായി കൂടിക്കാഴ്ച്ചയ്ക്ക് സമയം തേടിയിട്ടുണ്ട്. സിദ്ധരാമയ്യ രാജിനല്‍കിയാല്‍ നാളെ നിയമസഭാ കക്ഷിയോഗം വിളിച്ചു ചേര്‍ത്ത് ഡി.കെ ശിവകുമാറിനെ നേതാവായി തെരഞ്ഞെടുക്കാനാണ് നീക്കം. അങ്ങനെയെങ്കില്‍, അടുത്ത ആഴ്ച ആദ്യംതന്നെ പുതിയ മന്ത്രിസഭയുടെ സ്ത്യപ്രതിജ്ഞ ഉണ്ടായേക്കും. അതേസമയം, 

ചൊവ്വാഴ്ച ഡല്‍ഹിയില്‍ കോണ്‍ഗ്രസ് ഹൈക്കമാന്‍ഡുമായുള്ള കൂടിക്കാഴ്ചയില്‍ സ്ഥാനമൊഴിയാന്‍  സിദ്ധരാമയ്യ സമ്മതമറിയിച്ചതായാണ് വിവരം. അധികാര കൈമാറ്റ ധാരണ നടപ്പിലാക്കാനുള്ള കോണ്‍ഗ്രസ് നേതൃത്വത്തിന്റെ നിര്‍ദേശം താന്‍ സ്വീകരിക്കുന്നതായി ഡല്‍ഹിയില്‍ നിന്ന് തിരികെ ബംഗളൂരുവിലെത്തിയ സിദ്ധരാമയ്യ അടുത്ത നേതാക്കളോട് വ്യക്തമാക്കിയതായാണ് സൂചന. രാഹുല്‍ ഗാന്ധി ആവശ്യപ്പെടുന്ന പക്ഷം മുഖ്യമന്ത്രി സ്ഥാനം ഒഴിയുമെന്ന് നേരത്തെ താന്‍ വ്യക്തമാക്കിയതാണെന്നും ഇപ്പോള്‍ അദ്ദേഹം ആവശ്യപ്പെട്ടതിനാല്‍ സ്ഥാനമൊഴിയുകയാണെന്നും സിദ്ധരാമയ്യ അറിയിച്ചു. 

2023ലെ നിയമസഭ തെരഞ്ഞെടുപ്പില്‍ കോണ്‍ഗ്രസ് ഭൂരിപക്ഷം നേടിയ  ശേഷം മുഖ്യമന്ത്രി സ്ഥാനത്തേക്ക് സിദ്ധരാമയ്യയും ശിവകുമാറും അവകാശവാദമുന്നയിച്ചിരുന്നു. തുടര്‍ന്ന് തര്‍ക്കം പരിഹരിക്കാനായി കോണ്‍ഗ്രസ് ഹൈക്കമാന്‍ഡ് നിര്‍ദേശിച്ച രണ്ടര വര്‍ഷം വീതമുള്ള അധികാര പങ്കിടല്‍ ധാരണ പ്രകാരമാണ് ഇപ്പോള്‍ സിദ്ധരാമയ്യ പദവി ഒഴിയുന്നതും പകരം ശിവകുമാര്‍ മുഖ്യമന്ത്രിയാകുന്നതും.

അതേസമയം, മുഖ്യമന്ത്രി സ്ഥാനത്ത് നിന്ന് ഒഴിവാകുന്ന സിദ്ധരാമയ്യയെ രാജ്യസഭാംഗമാക്കി ദേശീയ രാഷ്ട്രീയത്തില്‍ സുപ്രധാന പദവിയില്‍ അവരോധിക്കാന്‍ നേതൃത്വം ആഗ്രഹിക്കുന്നതായി വിവരമുണ്ട്. രാജ്യസഭാ സീറ്റില്‍ താല്‍പര്യമില്ലെങ്കില്‍ സംസ്ഥാന കോണ്‍ഗ്രസ് പ്രസിഡന്റ് പദവി, മകനും നിയമനിര്‍മാണ കൗണ്‍സില്‍ അംഗവുമായ യതീന്ദ്രയ്ക്ക് മന്ത്രി പദവി തുടങ്ങിയ വാഗ്ദാനവും നല്‍കിയതായാണ് സൂചന.