മസ്‌കത്ത്: ഒമാനിലെ വടക്കന്‍ അല്‍ ബതിന ഗവര്‍ണറേറ്റിലെ പ്രധാന വ്യാവസായിക നഗരങ്ങളിലൊന്നായ സോഹാറിന്റെ വികസന ചരിത്രത്തില്‍ പുതിയ അധ്യായത്തിന് തുടക്കമാകുന്ന വമ്പന്‍ നഗരപദ്ധതിയുമായി ഒമാന്‍ സര്‍ക്കാര്‍. 'ഫ്യൂച്ചര്‍ സോഹാര്‍ സിറ്റി' എന്ന പേരില്‍ പ്രഖ്യാപിച്ചിരിക്കുന്ന പുതിയ നഗര വികസന പദ്ധതി സോഹാറിനെ പൂര്‍ണമായും ആധുനികവും സുസ്ഥിരവുമായ സ്മാര്‍ട്ട് നഗരമാക്കി മാറ്റുക എന്ന ലക്ഷ്യത്തോടെയാണ് രൂപകല്‍പന ചെയ്തിരിക്കുന്നത്. പദ്ധതി പൂര്‍ത്തിയാകുമ്പോള്‍ ഏകദേശം 70,000 പേര്‍ക്ക് താമസിക്കാനാകുന്ന തരത്തിലുള്ള സൗകര്യങ്ങളാണ് ഇവിടെ ഒരുക്കുക.

ഒമാന്റെ ഹൗസിംഗ് ആന്‍ഡ് അര്‍ബന്‍ പ്ലാനിംഗ് മന്ത്രാലയത്തിന്റെ നേതൃത്വത്തില്‍ നടപ്പാക്കുന്ന പദ്ധതിക്ക് രാജ്യത്തിന്റെ ദീര്‍ഘകാല വികസന ദര്‍ശനമായ 'ഒമാന്‍ വിഷന്‍ 2040'ന്റെ ഭാഗമായാണ് പ്രാധാന്യം ലഭിക്കുന്നത്. ജനസംഖ്യാ വര്‍ധന, നഗരവികസന ആവശ്യങ്ങള്‍, വ്യവസായ വളര്‍ച്ച, നിക്ഷേപ സാധ്യതകള്‍ എന്നിവ മുന്നില്‍ കണ്ടാണ് പുതിയ നഗരത്തിന്റെ ആസൂത്രണം.

സോഹാര്‍ തുറമുഖത്തിനും വ്യാവസായിക മേഖലയ്ക്കും സമീപത്തായി ഏകദേശം 6.5 ചതുരശ്ര കിലോമീറ്റര്‍ വിസ്തൃതിയിലായിരിക്കും പുതിയ നഗരം വികസിപ്പിക്കുക. താമസ സമുച്ചയങ്ങള്‍ക്കൊപ്പം ആധുനിക വ്യാപാര കേന്ദ്രങ്ങള്‍, വിനോദ മേഖലകള്‍, വിദ്യാഭ്യാസ സ്ഥാപനങ്ങള്‍, ആരോഗ്യ സേവന കേന്ദ്രങ്ങള്‍, പൊതുപാര്‍ക്കുകള്‍, സൈക്കിള്‍ പാതകള്‍, നടപ്പാതകള്‍ എന്നിവയും പദ്ധതിയുടെ ഭാഗമായി ഉള്‍പ്പെടുത്തും. കുടുംബങ്ങള്‍ക്ക് സൗഹൃദപരമായ അന്തരീക്ഷം ഒരുക്കുന്നതിനും പരിസ്ഥിതി സൗഹൃദ വികസനം ഉറപ്പാക്കുന്നതിനും പ്രത്യേക പരിഗണന നല്‍കുമെന്ന് അധികൃതര്‍ വ്യക്തമാക്കി.

ഗതാഗത രംഗത്തും വലിയ മാറ്റങ്ങള്‍ ലക്ഷ്യമിടുന്ന പദ്ധതിയാണിത്. സ്മാര്‍ട്ട് റോഡ് ശൃംഖലകള്‍, പൊതുഗതാഗത സംവിധാനം, ഭാവിയിലെ റെയില്‍വേ ബന്ധം എന്നിവ പരിഗണിച്ചായിരിക്കും നഗര രൂപകല്‍പന. സാങ്കേതിക വിദ്യയുടെ സഹായത്തോടെ ഊര്‍ജ ഉപഭോഗം നിയന്ത്രിക്കുന്ന സംവിധാനങ്ങളും ജലസംരക്ഷണ മാര്‍ഗങ്ങളും നഗരത്തിന്റെ അടിസ്ഥാന സൗകര്യങ്ങളില്‍ ഉള്‍പ്പെടുത്തും. പരിസ്ഥിതി സംരക്ഷണവും സുസ്ഥിരതയും മുന്‍നിര്‍ത്തിയുള്ള നിര്‍മാണ മാതൃകയായിരിക്കും ഫ്യൂച്ചര്‍ സോഹാര്‍ സിറ്റിയെന്ന് അധികൃതര്‍ പറയുന്നു.

സോഹാര്‍ ഇതിനകം തന്നെ ഒമാനിലെ പ്രധാന വ്യാവസായികലോജിസ്റ്റിക് കേന്ദ്രങ്ങളിലൊന്നാണ്. തുറമുഖം, ഫ്രീസോണ്‍, പെട്രോകെമിക്കല്‍ മേഖലകള്‍, വന്‍കിട വ്യവസായ സ്ഥാപനങ്ങള്‍ എന്നിവയുടെ സാന്നിധ്യം പ്രദേശത്തിന്റെ സാമ്പത്തിക പ്രാധാന്യം വര്‍ധിപ്പിച്ചിട്ടുണ്ട്. പുതിയ നഗരപദ്ധതി ഈ വളര്‍ച്ചയെ കൂടുതല്‍ ശക്തിപ്പെടുത്തുകയും ആഭ്യന്തരവിദേശ നിക്ഷേപകരെ ആകര്‍ഷിക്കുകയും ചെയ്യുമെന്നാണ് പ്രതീക്ഷ.

പദ്ധതിയുടെ മാസ്റ്റര്‍പ്ലാനും എന്‍ജിനീയറിങ് ഡിസൈനും തയ്യാറാക്കുന്നതിനായി കണ്‍സള്‍ട്ടന്‍സി ടെന്‍ഡറുകള്‍ ക്ഷണിച്ചുകഴിഞ്ഞു. വിവിധ രാജ്യങ്ങളില്‍നിന്നുള്ള പ്രമുഖ കമ്പനികള്‍ ഇതിനായി താല്‍പര്യം പ്രകടിപ്പിച്ചിട്ടുണ്ടെന്നാണ് റിപ്പോര്‍ട്ടുകള്‍. കരാര്‍ നടപടികള്‍ പൂര്‍ത്തിയായതിന് ശേഷം നിര്‍മാണ പ്രവര്‍ത്തനങ്ങളുടെ ആദ്യഘട്ടം ആരംഭിക്കുമെന്നാണ് വിവരം.

ഒമാനിലെ നഗര വികസനരംഗത്ത് വലിയ മാറ്റങ്ങള്‍ക്ക് വഴിയൊരുക്കുന്ന പദ്ധതികളിലൊന്നായാണ് ഫ്യൂച്ചര്‍ സോഹാര്‍ സിറ്റിയെ വിലയിരുത്തുന്നത്. തൊഴില്‍ അവസരങ്ങളും നിക്ഷേപ സാധ്യതകളും വര്‍ധിപ്പിക്കുന്നതോടൊപ്പം പുതിയ തലമുറയുടെ ജീവിതശൈലിക്ക് അനുയോജ്യമായ സ്മാര്‍ട്ട് നഗരമായി സോഹാറിനെ മാറ്റാനുള്ള നീക്കമായും ഇത് കണക്കാക്കപ്പെടുന്നു.

Oman unveils the ‘Future Sohar City’ project aimed at transforming Sohar into a modern smart city with housing for 70,000 residents, advanced infrastructure, and sustainable urban development under Oman Vision 2040.