ദുബൈ: കുവൈത്തിനെതിരെ ഇറാൻ നടത്തുന്ന തുടർച്ചയായ മിസൈൽ ആക്രമണങ്ങളെ ശക്തമായി അപലപിച്ച് യുഎഇ. ഇത്തരം ക്രൂരമായ നീക്കങ്ങൾ ഗൾഫ് മേഖലയുടെ സ്ഥിരതയ്ക്ക് ഗുരുതരമായ ഭീഷണിയാണെന്ന് യുഎഇ പ്രസിഡന്റിന്റെ നയതന്ത്ര ഉപദേഷ്ടാവ് ഡോ. അൻവർ മുഹമ്മദ് ഗർഗാഷ് കുറ്റപ്പെടുത്തി.

മേഖലയിൽ സമാധാനവും സ്ഥിരതയും പുനഃസ്ഥാപിക്കാനുള്ള നയതന്ത്ര ശ്രമങ്ങൾ സജീവമായി നടക്കുന്ന സാഹചര്യത്തിലാണ് ഇറാന്റെ ഭാഗത്തുനിന്ന് ഈ പുതിയ പ്രകോപനമെന്നും അദ്ദേഹം ചൂണ്ടിക്കാട്ടി. തന്റെ ഔദ്യോഗിക എക്സ് അക്കൗണ്ടിലൂടെയായിരുന്നു അദ്ദേഹത്തിന്റെ പ്രതികരണം.

ഇറാന്റെ ഭാഗത്തുനിന്നുണ്ടാകുന്ന സൈനിക നീക്കങ്ങൾ മറ്റ് രാജ്യങ്ങളുടെ പരമാധികാരത്തിന്മേലുള്ള കടന്നുകയറ്റവും അന്താരാഷ്ട്ര നിയമങ്ങളുടെ ലംഘനവുമാണെന്ന് ഡോ. അൻവർ ഗർഗാഷ് വ്യക്തമാക്കി. യുദ്ധങ്ങളുടെയും പ്രതിസന്ധികളുടെയും കടുത്ത സാഹചര്യങ്ങളിൽ നിന്ന് ഗൾഫ് മേഖലയെ മോചിപ്പിക്കാനുള്ള നിരന്തരമായ ശ്രമങ്ങളെ ദുർബലപ്പെടുത്തുന്ന ഇത്തരം സമീപനങ്ങൾ ഒട്ടും അസ്വീകാര്യമാണെന്നും അദ്ദേഹം പറഞ്ഞു.

"സഹോദര രാഷ്ട്രമായ കുവൈത്തിനെതിരെ ഇറാന്റെ ഭാഗത്തുനിന്നുണ്ടാകുന്ന തുടർച്ചയായ ക്രൂരമായ ആക്രമണങ്ങളെ ഞങ്ങൾ ശക്തമായി അപലപിക്കുന്നു. കുവൈത്തിനൊപ്പം യുഎഇ പൂർണ്ണഹൃദയത്തോടെ നിലകൊള്ളുന്നു. കുവൈത്തിന്റെ സുരക്ഷ ഞങ്ങളുടെയും സുരക്ഷയാണ്. ഈ ഗുരുതരമായ ആക്രമണങ്ങൾ മേഖലയ്ക്കും അതിന്റെ സ്ഥിരതയ്ക്കും ​ഗുരുതര ഭീഷണിയാണ്." ഡോ. അൻവർ മുഹമ്മദ് ഗർഗാഷ് കൂട്ടിച്ചേർത്തു.

വ്യോമ പ്രതിരോധം ശക്തമാക്കി കുവൈത്ത്

കുവൈത്തിനെ ലക്ഷ്യമിട്ട് ഇറാന്റെ ഭാഗത്തുനിന്നുണ്ടായ മിസൈൽ, ഡ്രോൺ ആക്രമണങ്ങളെ തുടർന്ന് ഗൾഫ് മേഖലയിൽ നിലവിൽ വലിയ രീതിയിൽ സംഘർഷം രൂക്ഷമായിരിക്കുകയാണ്. എന്നാൽ, രാജ്യത്തിന് നേരെ വന്ന ആക്രമണങ്ങളെല്ലാം തങ്ങളുടെ അത്യാധുനിക വ്യോമ പ്രതിരോധ സംവിധാനങ്ങൾ ഉപയോഗിച്ച് വിജയകരമായി പ്രതിരോധിച്ചതായി കുവൈത്ത് സുരക്ഷാ അധികൃതർ വ്യക്തമാക്കിയിട്ടുണ്ട്. അടിയന്തിര സാഹചര്യം നേരിടാൻ രാജ്യം സജ്ജമാണെന്നും അധികൃതർ കൂട്ടിച്ചേർത്തു.

ALSO READ: ടെക്സ്റ്റൈൽ മാലിന്യം കുറയ്ക്കാൻ യു.എ.ഇ; ‘നസീജ്’ പദ്ധതിക്ക് തുടക്കമായി

The UAE has strongly condemned the attack targeting Kuwait, with the UAE President’s Diplomatic Adviser reaffirming that Kuwait’s security is closely linked to the UAE’s security. The statement underscored solidarity, regional stability, and support for Kuwait’s sovereignty.