തിരുവനന്തപുരം: നെടുമങ്ങാട് പനവൂരില്‍ ഒന്നര വയസുകാരന്‍ അര്‍ഷിദിന്റെ മരണം രണ്ടാനച്ഛന്റെ ക്രൂരമായ മര്‍ദനം മൂലമെന്ന് പോസ്റ്റ്‌മോര്‍ട്ടം റിപോര്‍ട്ട്. അമ്മ അഖിലയുമായുള്ള വിവാഹ ജീവിതത്തിന് കുഞ്ഞ് ഒരു തടസ്സമാകുമെന്ന് കരുതി രണ്ടാനച്ഛനായ അഷ്‌കര്‍ കുട്ടിയെ ആസൂത്രിതമായി കൊലപ്പെടുത്തുകയായിരുന്നുവെന്ന് പൊലിസ് വ്യക്തമാക്കുന്നു.

പ്രതിയുടെ ചവിട്ടേറ്റ് കുഞ്ഞിന്റെ ഏഴ് വാരിയെല്ലുകള്‍ ഒടിഞ്ഞു. ആന്തരികാവയവങ്ങള്‍ക്കേറ്റ ഗുരുതരമായ പരിക്കാണ് മരണത്തിലേക്ക് നയിച്ചത്. കുട്ടിയുടെ ശരീരത്തില്‍ ചെറുതും വലുതുമായ 91 മുറിവുകള്‍ ഉള്ളതായി പോസ്റ്റ്‌മോര്‍ട്ടം റിപോര്‍ട്ടില്‍ പറയുന്നു. തലയ്‌ക്കേറ്റ ശക്തമായ അടിയില്‍ അഞ്ചിടങ്ങളില്‍ നീര്‍ക്കെട്ടുണ്ടായിട്ടുണ്ട്. കുഞ്ഞിനെ കൊലപ്പെടുത്താനായി പ്രതി ഒരു മാസത്തോളമായി പദ്ധതിയിട്ടിരുന്നതായും ഇതിന് മുന്‍പും ക്രൂരമായി ഉപദ്രവിച്ചിരുന്നതായും പൊലിസ് റിമാന്‍ഡ് റിപോര്‍ട്ടില്‍ പറയുന്നുണ്ട്. കൊലപാതകത്തിന് പ്രേരിപ്പിച്ചതിനും മര്‍ദനം മറച്ചുവച്ചതിനും കുട്ടിയുടെ അമ്മ അഖിലയ്‌ക്കെതിരെയും പൊലിസ് കേസെടുത്തിട്ടുണ്ട്.

കഴിഞ്ഞ വെള്ളിയാഴ്ചയാണ് കുഞ്ഞിനെ അബോധാവസ്ഥയില്‍ ആശുപത്രിയില്‍ പ്രവേശിപ്പിച്ചത്. ഭക്ഷണം കഴിക്കുന്നതിനിടെ ഛര്‍ദ്ദിച്ചുവെന്നാണ് അഷ്‌കര്‍ ആദ്യം പറഞ്ഞിരുന്നതെങ്കിലും വിശദമായ ചോദ്യം ചെയ്യലില്‍ പ്രതി കുറ്റം സമ്മതിക്കുകയായിരുന്നു. കരച്ചില്‍ നിര്‍ത്താത്തതിനെ തുടര്‍ന്ന് കുഞ്ഞിനെ ക്രൂരമായി മര്‍ദിക്കുകയായിരുന്നുവെന്ന് ഇയാള്‍ പൊലിസിനോട് സമ്മതിച്ചു.

A one-and-a-half-year-old boy in Nedumangad was brutally murdered by his stepfather, who considered the child a liability to his future married life, with the post-mortem report revealing severe internal injuries from the assault.