അബുദബി: യു.എ.ഇയിൽ വരും ദിവസങ്ങളിൽ ശക്തമായ കാറ്റിനും അന്തരീക്ഷത്തിൽ പൊടിപടലങ്ങൾ ഉയരാനും സാധ്യതയുള്ളതായി ദേശീയ കാലാവസ്ഥാ നിരീക്ഷണ കേന്ദ്രം (എൻസിഎം) അറിയിച്ചു. അതേസമയം, വാരാന്ത്യത്തോടെ രാജ്യത്ത് ചൂടിന് നേരിയ ശമനമുണ്ടാകും. കിഴക്കുനിന്നുള്ള ദുർബലമായ ന്യൂനമർദ മേഖലയുടെയും പടിഞ്ഞാറുനിന്നുള്ള ഉയർന്ന മർദമേഖലയുടെയും സ്വാധീനമാണ് നിലവിലെ കാലാവസ്ഥാ മാറ്റത്തിന് കാരണം.

വ്യാഴം, വെള്ളി ദിവസങ്ങളിൽ അന്തരീക്ഷത്തിൽ പൊടിപടലങ്ങൾ നിറയാൻ സാധ്യതയുണ്ട്. ശക്തമായ കാറ്റ് വീശുമെന്നതിനാൽ രാജ്യത്തിന്റെ പടിഞ്ഞാറൻ മേഖലകളിൽ കാഴ്ചപരിധി കുറയാൻ ഇടയുണ്ട്. വ്യാഴാഴ്ച മണിക്കൂറിൽ 45 കിലോമീറ്റർ വരെയും വെള്ളിയാഴ്ച 50 കിലോമീറ്റർ വരെയും വേഗതയിൽ കാറ്റ് വീശിയേക്കാം.

തീരദേശ മേഖലകളിൽ വെള്ളിയാഴ്ചയോടെ താപനിലയിൽ നേരിയ കുറവുണ്ടാകും. ശനിയാഴ്ചയോടെ ചൂട് വീണ്ടും കുറയുമെന്നാണ് പ്രവചനം. ഉൾപ്രദേശങ്ങളിൽ താപനില 43 ഡിഗ്രി മുതൽ 47 ഡിഗ്രി സെൽഷ്യസ് വരെയും, തീരദേശങ്ങളിലും ദ്വീപുകളിലും 36 മുതൽ 41 ഡിഗ്രി വരെയും ഉയർന്നേക്കാം. പർവത മേഖലകളിൽ 32 മുതൽ 37 ഡിഗ്രി സെൽഷ്യസ് വരെയായിരിക്കും താപനില.

വരും ദിവസങ്ങളിൽ അറേബ്യൻ ഗൾഫിൽ കടൽ പ്രക്ഷുബ്ധമാകാൻ സാധ്യതയുണ്ട്. വ്യാഴാഴ്ചയോടെ മോശം അവസ്ഥയിലാകുന്ന കടൽ വെള്ളിയാഴ്ചയോടെ കൂടുതൽ പ്രക്ഷുബ്ധമാകും. ശനിയാഴ്ചയും ഈ സ്ഥിതി തുടർന്നേക്കും. എന്നാൽ ഒമാൻ കടൽ ശാന്തമായിരിക്കുമെന്നും കാലാവസ്ഥാ കേന്ദ്രം വ്യക്തമാക്കി.

English summary : The UAE is experiencing a weather transition caused by a weak surface low-pressure system from the east and an extension of a high-pressure system from the west.

 Thursday and Friday are expected to bring dusty conditions and strong winds, which may reduce horizontal visibility, particularly in western areas. Wind speeds could reach up to 45 km/h on Thursday and up to 50 km/h on Friday.