തിരുവനന്തപുരം: മഴയ്ക്ക് ഇന്ന് താല്‍ക്കാലിക ശമനം. കാലാവസ്ഥ വകുപ്പ് പുറത്തിറക്കിയ മുന്നറിയിപ്പ് പ്രകാരം ഇന്ന് അഞ്ച് ജില്ലകളില്‍ യെല്ലോ അലര്‍ട്ടാണ് പ്രഖ്യാപിച്ചിട്ടുള്ളത്. ഒന്‍പത് ജില്ലകളില്‍ പ്രത്യേക മുന്നറിയിപ്പുകളൊന്നും നല്‍കിയിട്ടുമില്ല. കഴിഞ്ഞ ദിവസങ്ങളിലുണ്ടായിരുന്ന റെഡ്, ഓറഞ്ച് അലര്‍ട്ടുകള്‍ പിന്‍വലിച്ചിട്ടുണ്ട്. 

മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോഡ് ജില്ലകളിലാണ് ഇന്ന് യെല്ലോ അലര്‍ട്ടുള്ളത്. ഇവിടങ്ങളില്‍ അതിശക്തമായ മഴയ്ക്കാണ് സാധ്യതയുള്ളത്. കാലാവസ്ഥയില്‍ ദ്രുതഗതിയിലുള്ള മാറ്റം സംഭവിക്കാനുള്ള സാധ്യതയുള്ളതിനാല്‍ ജനങ്ങള്‍ മുന്നറിയിപ്പുകള്‍ കൃത്യമായി നിരീക്ഷിക്കണമെന്ന് കാലാവസ്ഥ വകുപ്പ് അറിയിച്ചിട്ടുണ്ട്. കേരള-ലക്ഷദ്വീപ്-കര്‍ണാടക തീരങ്ങളില്‍ ഇന്നും മത്സ്യബന്ധത്തിന് വിലക്ക് ഏര്‍പ്പെടുത്തിയിട്ടുണ്ട്.