ദുബൈ: പാം ജബൽ അലിയിലെ അൾട്രാ-ലക്സറി വില്ലകളുടെ നിർമ്മാണം പുരോഗമിക്കുന്നു. ഈ വർഷം അവസാനത്തോടെ വില്ലകളുടെ കൈമാറ്റം ആരംഭിക്കുമെന്ന് ദുബൈ ഹോൾഡിംഗ് റിയൽ എസ്റ്റേറ്റ് സിഇഒ ഖാലിദ് അൽ മാലിക് അറിയിച്ചു.

പാം ജബൽ അലി വികസന പദ്ധതിയിൽ നിർമ്മാണ പ്രവർത്തനങ്ങൾ വേഗത്തിൽ നടക്കുന്നുണ്ടെന്നും, അടിസ്ഥാന സൗകര്യങ്ങൾക്കും താമസ കേന്ദ്രങ്ങൾക്കും വലിയ പ്രാധാന്യമാണ് നൽകുന്നതെന്നും അദ്ദേഹം വ്യക്തമാക്കി. ഒറ്റയടിക്ക് കൈമാറുന്നതിന് പകരം ഘട്ടം ഘട്ടമായാകും പദ്ധതിയുടെ പൂർത്തീകരണം.

പാം ജബൽ അലിയുടെ നിർമ്മാണ കരാറുകൾ ഇതിനകം തന്നെ നൽകിയിട്ടുണ്ട്. പാം സെൻട്രൽ പ്രൈവറ്റ് റെസിഡൻസസ്, പാം ജബൽ അലി ഫ്രൈഡേ മോസ്ക് തുടങ്ങിയവ പദ്ധതിയുടെ ഭാഗമായി വരുന്നുണ്ട്. 80-ലധികം ഹോട്ടലുകളും റിസോർട്ടുകളും ഈ മാസ്റ്റർ പ്ലാനിന്റെ ഭാഗമായി വിഭാവനം ചെയ്തിട്ടുണ്ട്. ദുബൈയുടെ ഭാവി വികസന ഇടനാഴികളായ എക്സ്പോ സിറ്റി, അൽ മക്തൂം അന്താരാഷ്ട്ര വിമാനത്താവളം എന്നിവയുമായുള്ള കണക്റ്റിവിറ്റി ഈ പദ്ധതിയുടെ പ്രധാന ആകർഷണമാണ്.

English summary : Construction at Palm Jebel Ali is progressing rapidly, with the first villa handovers expected by the end of this year. Khaled Al Malik, CEO of Dubai Holding Real Estate, confirmed that the project is moving ahead as scheduled.