ദുബൈ: യുഎഇയുടെ ഗതാഗത ചരിത്രത്തില്‍ പുതിയ അധ്യായം കുറിച്ച് ഇത്തിഹാദ് റെയില്‍ യാത്രാ സര്‍വീസുകള്‍ക്ക് തുടക്കമാകുന്നു. ജൂണ്‍ 30നാണ് അബൂദബി - ഫുജൈറ റൂട്ടില്‍ ആദ്യഘട്ട സര്‍വീസുകള്‍ ആരംഭിക്കുന്നത്. യാത്രക്കാര്‍ക്ക് ഇപ്പോള്‍ ഔദ്യോഗിക വെബ്‌സൈറ്റ് (etihadrail.ae) വഴിയോ മൊബൈല്‍ ആപ്പ് വഴിയോ ടിക്കറ്റുകള്‍ മുന്‍കൂട്ടി ബുക്ക് ചെയ്യാം.

ടിക്കറ്റ് നിരക്കുകളും ക്ലാസുകളും

ഉദ്ഘാടനത്തോടനുബന്ധിച്ച് ടിക്കറ്റ് നിരക്കുകളില്‍ 50 ശതമാനം ഇളവ് പ്രഖ്യാപിച്ചിട്ടുണ്ട്. നിലവിലെ നിരക്കുകള്‍ താഴെ പറയുന്നവയാണ്:

* കംഫര്‍ട്ട് ക്ലാസ്: 109 ദിര്‍ഹത്തില്‍ നിന്ന് 55 ദിര്‍ഹമായി കുറച്ചു.
* പ്രീമിയം ക്ലാസ്: 239 ദിര്‍ഹത്തില്‍ നിന്ന് 120 ദിര്‍ഹമായി കുറച്ചു.

യാത്രക്കാര്‍ക്ക് സൗകര്യാര്‍ത്ഥം സേവര്‍, വാല്യൂ, ഫ്‌ലെക്‌സ് എന്നിങ്ങനെ മൂന്ന് ടിക്കറ്റ് വിഭാഗങ്ങളാണുള്ളത്. ഓരോ വിഭാഗത്തിനും മാറ്റങ്ങള്‍ വരുത്താനുള്ള സൗകര്യം, റീഫണ്ട് തുടങ്ങിയ കാര്യങ്ങളില്‍ വ്യത്യസ്തമായ വ്യവസ്ഥകളാണുള്ളത്.

സര്‍വീസ് സമയം

അബൂദബിയിലെ മുഹമ്മദ് ബിന്‍ സായിദ് സിറ്റി സ്റ്റേഷനില്‍ നിന്നും ഫുജൈറയിലെ അല്‍ ഹിലാല്‍ സിറ്റി സ്റ്റേഷനില്‍ നിന്നും ദിവസവും രാവിലെ 5 മുതല്‍ രാത്രി 11 വരെ സര്‍വീസുകളുണ്ടാകും.

*അബൂദബിയില്‍ നിന്ന് ഫുജൈറയിലേക്ക്: രാവിലെ 8:19, ഉച്ചയ്ക്ക് 1:53, വൈകുന്നേരം 6:39 എന്നീ സമയങ്ങളിലാണ് നേരിട്ടുള്ള ട്രെയിനുകള്‍.
* ഫുജൈറയില്‍ നിന്ന് അബൂദബിയിലേക്ക്: പുലര്‍ച്ചെ 5:34, രാവിലെ 10:59, വൈകുന്നേരം 5:28 എന്നിങ്ങനെയാണ് സമയക്രമം.

യാത്രയ്ക്ക് തയ്യാറെടുക്കുമ്പോള്‍

* ബുക്കിംഗ്: ഔദ്യോഗിക ആപ്പിലോ വെബ്‌സൈറ്റിലോ ലോഗിന്‍ ചെയ്ത് യാത്ര, തീയതി, ക്ലാസ് എന്നിവ തിരഞ്ഞെടുക്കാം. ക്രെഡിറ്റ്/ഡെബിറ്റ് കാര്‍ഡുകള്‍ വഴിയോ ഡിജിറ്റല്‍ വാലറ്റുകള്‍ വഴിയോ പണമടയ്ക്കാം.
* ഷട്ടില്‍ ബസ്: അബൂദബി സ്റ്റേഷനിലേക്ക് 10 ദിര്‍ഹം നിരക്കില്‍ ഷട്ടില്‍ ബസ് സൗകര്യം ലഭ്യമാണ്. അഡ്‌നോക് ഹെഡ്ക്വാര്‍ട്ടേഴ്‌സ്, അഡ്‌നെക് സെന്റര്‍, റീം മാള്‍ എന്നിവിടങ്ങളില്‍ നിന്ന് ബസ് സര്‍വീസുകളുണ്ട്.
* ലഗേജ്: മൂന്ന് വയസ്സിന് മുകളിലുള്ള യാത്രക്കാര്‍ക്ക് രണ്ട് ബാഗുകള്‍ വീതം സൗജന്യമായി കൊണ്ടുപോകാം. ലഗേജുകളില്‍ പേരും വിവരങ്ങളും രേഖപ്പെടുത്തേണ്ടത് നിര്‍ബന്ധമാണ്.

വിപുലീകരണ പദ്ധതികള്‍

ജൂണ്‍ 30ന് അബൂദബി - ഫുജൈറ റൂട്ടിലാണ് സര്‍വീസ് തുടങ്ങുന്നത്. തുടര്‍ന്ന് ഈ വര്‍ഷം സെപ്റ്റംബറില്‍ ദുബൈ, അല്‍ ദൈദ് സ്റ്റേഷനുകളും, ഡിസംബറില്‍ അല്‍ ദഫ്രയിലെ സ്റ്റേഷനുകളും പ്രവര്‍ത്തനം തുടങ്ങും. 2027 മാര്‍ച്ച് 30ഓടെ ഷാര്‍ജ സ്റ്റേഷന്‍ കൂടി തുറക്കുന്നതോടെ പദ്ധതി പൂര്‍ണ്ണതോതിലാകും. വൈഫൈ സൗകര്യം ഉള്‍പ്പെടെയുള്ള ആധുനിക സംവിധാനങ്ങളോടെയാണ് ട്രെയിനുകള്‍ സജ്ജീകരിച്ചിരിക്കുന്നത്. ഓരോ ട്രെയിനിലും 400 യാത്രക്കാര്‍ക്ക് ഒരേസമയം സഞ്ചരിക്കാനാകും.

English Sumamry: 

Etihad Rail has officially opened ticket bookings for its highly anticipated inter-emirate passenger train service. The service is set to launch on June 30, 2026, starting with the route between Abu Dhabi and Fujairah. To mark the launch, Etihad Rail is offering a 50% discount on ticket prices:
Comfort Class: Reduced from Dh109 to Dh55.
Premium Class: Reduced from Dh239 to Dh120.
Passengers can choose between three ticket tiers—Saver, Value, and Flex—each offering different levels of flexibility regarding cancellations, refunds, and ticket transfers.