തിരുവനന്തപുരം: ആറ്റുകാലിൽ യുവതിയെ ഭർതൃവീട്ടിൽ ജീവനൊടുക്കിയ നിലയിൽ കണ്ടെത്തിയ സംഭവത്തിൽ സംസ്ഥാന വനിതാ കമ്മിഷൻ സ്വമേധയാ കേസെടുത്തു. ആറ്റുകാൽ സ്വദേശിനി ആരതിയെയാണ് ഇന്ന് രാവിലെ മരിച്ച നിലയിൽ കണ്ടെത്തിയത്. സംഭവത്തിൽ സമഗ്രവും വസ്തുനിഷ്ഠവുമായ അന്വേഷണം നടത്തി അടിയന്തരമായി റിപ്പോർട്ട് സമർപ്പിക്കാൻ കേരള പൊലിസിന് നിർദേശം നൽകിയതായി വനിതാ കമ്മിഷൻ അധ്യക്ഷ പി. സതീദേവി അറിയിച്ചു.

ആരതിയുടെ മരണത്തിന് പിന്നിൽ ഭർത്താവിന്റെ ക്രൂരമായ ഗാർഹിക പീഡനമാണെന്ന് യുവതിയുടെ കുടുംബം ആരോപിച്ചു. മരണത്തിന് തൊട്ടുമുമ്പ്, ഭർത്താവ് തന്നെ ക്രൂരമായി മർദിച്ചതിന്റെ ചിത്രങ്ങൾ ആരതി അമ്മയ്ക്ക് വാട്‌സ്ആപ്പിൽ അയച്ചിരുന്നതായും കുടുംബം വെളിപ്പെടുത്തി. ഈ ചിത്രങ്ങൾ കേസ് അന്വേഷണത്തിൽ നിർണായക തെളിവുകളാകും.

യുവതിയുടെ കുടുംബത്തിന്റെ പരാതിയുടെ അടിസ്ഥാനത്തിൽ ഗാർഹിക പീഡനം, ആത്മഹത്യാ പ്രേരണ എന്നീ കുറ്റങ്ങൾ ചുമത്തി പൊലിസ് കേസ് രജിസ്റ്റർ ചെയ്തിട്ടുണ്ട്. സംഭവവുമായി ബന്ധപ്പെട്ട് ആരതിയുടെ ഭർത്താവ് അതുലിനെ ഫോർട്ട് പൊലിസ് കസ്റ്റഡിയിലെടുത്ത് ചോദ്യം ചെയ്തുവരികയാണ്. കേസുമായി ബന്ധപ്പെട്ട് കൃത്യമായ അന്വേഷണം ഉറപ്പാക്കുമെന്ന് വനിതാ കമ്മിഷൻ വ്യക്തമാക്കി.

A young woman was found dead under mysterious circumstances at her husband's residence in Attukal. Following the incident, the Kerala State Women's Commission registered a self-initiated (suo motu) case to investigate the matter. The local police have taken the husband into custody for questioning as part of their ongoing investigation.