ഇടുക്കി: മുല്ലപ്പെരിയാറില്‍ പുതിയൊരു അണക്കെട്ട് നിര്‍മ്മിക്കുന്നതുമായി ബന്ധപ്പെട്ട് കേരളവും തമിഴ്‌നാടും തമ്മിലുള്ള നിര്‍ണായക ചര്‍ച്ച ഇന്ന് നടക്കും. പാര്‍ലമെന്റിന്റെ ജലവിഭവ സ്റ്റാന്‍ഡിങ് കമ്മിറ്റിക്ക് മുന്‍പാകെയാണ് ഇരു സംസ്ഥാനങ്ങളിലെയും ഉദ്യോഗസ്ഥര്‍ തങ്ങളുടെ നിലപാടുകള്‍ വ്യക്തമാക്കുക. മൂന്നാറില്‍ രാവിലെ 10 മണിക്ക് ആരംഭിക്കുന്ന യോഗത്തില്‍ ഇരുപക്ഷത്തെയും വകുപ്പ് സെക്രട്ടറിമാര്‍ പങ്കെടുക്കും.

തമിഴ്‌നാടിന് ആവശ്യമായ വെള്ളം ഉറപ്പാക്കിക്കൊണ്ട് കേരളത്തിന്റെ സുരക്ഷയ്ക്കായി പുതിയ ഡാം പണിയുക എന്ന തങ്ങളുടെ ഔദ്യോഗിക നിലപാട് കേരളം യോഗത്തില്‍ ആവര്‍ത്തിക്കും. കേന്ദ്ര ജല കമ്മീഷനുമായി സഹകരിച്ച് കേരളത്തില്‍ നടപ്പാക്കുന്ന വിവിധ പദ്ധതികളും യോഗത്തിന്റെ പരിഗണനയ്ക്ക് വരും.

കേന്ദ്ര ജലവിഭവ സ്റ്റാന്‍ഡിങ് കമ്മിറ്റി ചെയര്‍മാനായ രാജീവ് പ്രതാപ് റൂഡി എംപിയുടെ അധ്യക്ഷതയിലാണ് യോഗം വിളിച്ചു ചേര്‍ത്തിരിക്കുന്നത്. സമിതിയിലെ അംഗങ്ങളായ ജെബി മേത്തര്‍, ഡീന്‍ കുര്യാക്കോസ് എന്നീ എംപിമാരും ചര്‍ച്ചകളില്‍ പങ്കാളികളാകും.

തമിഴ്‌നാട്ടില്‍ ഭരണം മാറിയതിന് ശേഷം മുല്ലപ്പെരിയാര്‍ വിഷയത്തില്‍ നടക്കുന്ന ആദ്യത്തെ അന്തര്‍സംസ്ഥാന ചര്‍ച്ചയാണിത്. പുതിയതായി അധികാരമേറ്റ വിജയ് സര്‍ക്കാരിന്റെ ആദ്യ നയപ്രഖ്യാപനത്തില്‍, കേരളം പുതിയ അണക്കെട്ട് നിര്‍മ്മിക്കുന്നതിനെ ശക്തമായി എതിര്‍ക്കുമെന്നും നിലവിലെ ഡാമിന്റെ ജലനിരപ്പ് 152 അടിയായി ഉയര്‍ത്താന്‍ ശ്രമിക്കുമെന്നും വ്യക്തമാക്കിയിരുന്നു. ഈ സാഹചര്യത്തില്‍ ഇരു സംസ്ഥാനങ്ങളും തമ്മില്‍ നടക്കാന്‍ പോകുന്ന ഇന്നത്തെ ചര്‍ച്ചയ്ക്ക് ഏറെ രാഷ്ട്രീയ സാമൂഹിക പ്രാധാന്യമുണ്ട്.

Kerala and Tamil Nadu are set to discuss the proposal for a new Mullaperiyar dam today in Munnar before the Central Standing Committee on Water Resources, amidst opposing stances from both states.