കോഴിക്കോട്: മുക്കം പൊലിസ് സ്റ്റേഷനിലെ ഗ്രേഡ് എഎസ്‌ഐയെ കാണാനില്ല. ബാലുശ്ശേരി പൂരത്ത് വീട്ടില്‍ അബ്ദുല്‍ റഷീദിനെയാണ് കഴിഞ്ഞ ദിവസം രാവിലെ മുതല്‍ കാണാതായത്. രാവിലെ ആറരയോടെ വീട്ടില്‍ നിന്ന് മകളുമായി ബൈക്കില്‍ ഇറങ്ങിയ അദ്ദേഹം, മകളെ ബാലുശ്ശേരി സ്റ്റാന്‍ഡില്‍ ഇറക്കിയിരുന്നു. എന്നാല്‍ അതിനുശേഷം അദ്ദേഹം ജോലി സ്ഥലമായ മുക്കം സ്റ്റേഷനിലോ തിരികെ വീട്ടിലോ എത്തിയിട്ടില്ല. കുടുംബം നല്‍കിയ പരാതിയില്‍ ബാലുശേരി പൊലിസ് അന്വേഷണം ആരംഭിച്ചു. 

അതേസമയം പൊലിസ് നടത്തിയ പരിശോധനയില്‍ റഷീദ് തച്ചംപൊയില്‍ എന്ന സ്ഥലം വരെ ബൈക്കില്‍ സഞ്ചരിക്കുന്ന ദൃശ്യങ്ങള്‍ ലഭിച്ചിട്ടുണ്ട്. പിന്നീട് എങ്ങോട്ടാണ് പോയത് എന്ന കാര്യത്തില്‍ വ്യക്തതയില്ല.അവസാന മൊബൈല്‍ ലൊക്കേഷന്‍ കാണിക്കുന്നത് മൈസൂരിലാണ്. ഈ സൂചനയുടെ അടിസ്ഥാനത്തില്‍ ബാലുശ്ശേരി പൊലീസിന്റെ ഒരു സംഘം മൈസൂരിലേക്ക് തിരിച്ചിട്ടുണ്ട്.