കോഴിക്കോട്: സമസ്ത നാഷനൽ എജ്യുക്കേഷൻ കൗൺസിലിന്റെ (എസ്.എൻ.ഇ. സി)  നേതൃത്വത്തിൽ പെൺകുട്ടികളുടെ നീറ്റ്-ജെ.ഇ.ഇ റിപ്പീറ്റേഴ്സ് ബാച്ച് ആരംഭിക്കാൻ  കോഴിക്കോട് സമസ്ത കാര്യാലയത്തിൽ ചേർന്ന ഗവേണിങ് കൗൺസിൽ യോഗം തീരുമാനിച്ചു.  വിദ്യാർഥിനികൾക്ക് മികച്ച അക്കാദമിക പിന്തുണയും മത്സരപരീക്ഷാ പരിശീലനവും ഉറപ്പാക്കുന്ന രീതിയിലാണ് കോഴ്സ്.

ദേശീയതലത്തിലുള്ള മത്സരപരീക്ഷാ പരിശീലനത്തിൽ പരിചയസമ്പന്നരായ അധ്യാപകരുടെ നേതൃത്വത്തിൽ സമഗ്രമായ പഠനപദ്ധതി, വിഷയാടിസ്ഥാനത്തിലുള്ള ക്ലാസുകൾ, ദൈനംദിന പരിശീലന പരീക്ഷകൾ, ആഴ്ചതോറുമുള്ള ഗ്രാൻഡ് ടെസ്റ്റുകൾ, ദേശീയ നിലവാരത്തിലുള്ള മോഡൽ പരീക്ഷകൾ, വ്യക്തിഗത മെന്ററിങ്, സംശയനിവാരണ സെഷനുകൾ എന്നിവ ഉണ്ടാകും. ഓരോ വിദ്യാർഥിനിയുടെയും പഠനപുരോഗതി പ്രത്യേകം വിലയിരുത്തും. അക്കാദമിക മികവിനൊപ്പം ആത്മവിശ്വാസവും പരീക്ഷാ സന്നദ്ധതയും വളർത്തുന്നതിന് പ്രത്യേക കൗൺസിലിങ്,  മതപരമായ ശിക്ഷണം എന്നിവയും നൽകും.

ഹയർ സെക്കൻഡറി സയൻസ് (ബയോളജി) സബ്ജക്ടിൽ ഫുൾ മാർക്ക് നേടിയ വിദ്യാർഥിനികൾക്കും നീറ്റ് പരീക്ഷയിൽ 500 മാർക്കിന് മുകളിൽ നേടിയവർക്കും അക്കാദമിക് ഫീസിൽ 100% സ്കോളർഷിപ്പും ബയോളജിയിൽ  ഫുൾ A  നേടിയവർക്കും നീറ്റ് പരീക്ഷയിൽ 450 മാർക്കിന് മുകളിൽ നേടിയവർക്കും  ഫീസിൽ 50% സ്കോളർഷിപ്പും കൗൺസിൽ പ്രഖ്യാപിച്ചു.  യോഗത്തിൽ സമസ്ത സെക്രട്ടറി കെ ഉമർ ഫൈസി മുക്കം അധ്യക്ഷനായി.  മുശാവറ അംഗം ഡോ. സി.കെ അബ്ദുറഹ്മാൻ ഫൈസി അരിപ്ര, എസ്.എൻ.ഇ.സി അക്കാദമിക് കൗൺസിൽ ചെയർമാൻ പി.എം അബ്ദുസ്സലാം ബാഖവി വടക്കേക്കാട്, സാബിഖലി ശിഹാബ് തങ്ങൾ പാണക്കാട്, ഡോ. എൻ.എ.എം അബ്ദുൽ ഖാദർ, അബ്ദുൽ ഹമീദ് ഫൈസി അമ്പലക്കടവ്, ഇ. മൊയ്‌തീൻ ഫൈസി പുത്തനഴി, ഇബ്രാഹിം ഫൈസി പേരാൽ, എ.എം പരീദ് എറണാകുളം, എസ്.വി മുഹമ്മദലി, സത്താർ പന്തലൂർ, മുസ്തഫ  മുണ്ടുപാറ, നാസർ ഫൈസി കൂടത്തായി, സുലൈമാൻ ദാരിമി ഏലംകുളം സംബന്ധിച്ചു.