2026 ഫിഫ ലോകകപ്പിൽ ആഫ്രിക്കൻ കരുത്തരായ മൊറോക്കോയെ തകർത്ത് ഫ്രാൻസ് സെമി ഫൈനലിൽ പ്രവേശിച്ചു. ബോസ്റ്റൺ സ്റ്റേഡിയത്തിൽ നടന്ന ആവേശകരമായ ക്വാർട്ടർ ഫൈനൽ പോരാട്ടത്തിൽ ഏകപക്ഷീയമായ രണ്ട് ഗോളുകൾക്കാണ് ലെസ് ബ്ലൂസിന്റെ വിജയം. നായകൻ കിലിയൻ എംബാപ്പെ, ഉസ്മാൻ ഡെംബലെ എന്നിവരുടെ തകർപ്പൻ ഗോളുകളാണ് ഫ്രഞ്ച് പടയ്ക്ക് തുടർച്ചയായ മൂന്നാം ലോകകപ്പ് സെമി ഫൈനൽ ടിക്കറ്റ് ഉറപ്പാക്കിയത്.

മത്സരത്തിന്റെ ആദ്യ പകുതി ഗോൾരഹിതമായിരുന്നു. ആദ്യ പകുതിയിൽ ലഭിച്ച പെനാൽറ്റി ലക്ഷ്യത്തിലെത്തിക്കാൻ എംബാപ്പെയ്ക്ക് കഴിഞ്ഞിരുന്നില്ല. മൊറോക്കൻ ഗോൾകീപ്പർ യാസിൻ ബോണോയുടെ മികച്ച സേവ് ഫ്രാൻസിന് ലീഡ് നിഷേധിക്കുകയായിരുന്നു. എന്നാൽ രണ്ടാം പകുതിയിൽ ശക്തമായ തിരിച്ചുവരവാണ് ഫ്രഞ്ച് നായകൻ നടത്തിയത്.

എംബാപ്പെയുടെ തിരിച്ചുവരവും ചരിത്രനേട്ടവും

മത്സരത്തിന്റെ 60-ാം മിനിറ്റിൽ മനോഹരമായൊരു കേളിംഗ് ഷോട്ടിലൂടെ എംബാപ്പെ ഫ്രാൻസിന് ആദ്യ ലീഡ് സമ്മാനിച്ചു. നടപ്പു ലോകകപ്പിൽ എംബാപ്പെയുടെ എട്ടാമത്തെ ഗോളായിരുന്നു ഇത്.

ആദ്യ ഗോളിന്റെ ആവേശം അടങ്ങും മുൻപ് ഫ്രാൻസ് അടുത്ത പ്രഹരമേൽപ്പിച്ചു. എംബാപ്പെയുടെ അസിസ്റ്റിൽ നിന്നും ഉസ്മാൻ ഡെംബലെയാണ് ഫ്രാൻസിന്റെ രണ്ടാം ഗോൾ സ്കോർ ചെയ്തത്.

ഈ ഗോളിനും അസിസ്റ്റിനും പിന്നാലെ ഫ്രഞ്ച് ഫുട്ബോൾ ചരിത്രത്തിൽ മറ്റാർക്കും നേടാനാകാത്ത ഒരു അത്യപൂർവ്വ റെക്കോർഡും കിലിയൻ എംബാപ്പെ സ്വന്തമാക്കി. ഫ്രാൻസ് ദേശീയ ടീമിനായി 100 ഗോൾ കോൺട്രിബ്യൂഷൻ (Goal Contributions) നടത്തുന്ന ആദ്യ താരം എന്ന ചരിത്രനേട്ടമാണ് ഈ 27-കാരൻ തന്റെ പേരിൽ കുറിച്ചത്. ഫ്രഞ്ച് കുപ്പായത്തിൽ 64 ഗോളുകളും 36 അസിസ്റ്റുകളുമാണ് എംബാപ്പെയുടെ സമ്പാദ്യം. കൂടാതെ ലോകകപ്പ് ചരിത്രത്തിൽ 20 ഗോളുകൾ എന്ന നാഴികക്കല്ലിലും താരം എത്തിച്ചേർന്നു.

രണ്ട് ഗോളുകൾക്ക് പിന്നിലായതോടെ മൊറോക്കോ തിരിച്ചടിക്കാൻ ശ്രമിച്ചെങ്കിലും ഫ്രഞ്ച് പ്രതിരോധം ശക്തമായി നിലയുറപ്പിച്ചതോടെ അവരുടെ മുന്നേറ്റങ്ങളെല്ലാം പരാജയപ്പെടുകയായിരുന്നു. ഫൈനൽ വിസിൽ മുഴങ്ങിയപ്പോൾ എതിരില്ലാത്ത രണ്ട് ഗോളുകളുടെ ജയവുമായി ഫ്രാൻസ് സെമിയിലേക്ക് കുതിച്ചു.

സെമി ഫൈനൽ പോരാട്ടം ജൂലൈ 15-ന്

ലോകകപ്പിന്റെ സെമി ഫൈനലിൽ ജൂലൈ 15-നാണ് ഫ്രാൻസ് ഇനി കളത്തിലിറങ്ങുക. സ്പെയിൻ - ബെൽജിയം മത്സരത്തിലെ വിജയികളെയായിരിക്കും ഫ്രാൻസ് സെമിയിൽ നേരിടുക.