കൊല്ലം: ബി.ജെ.പി നേതാവും ചാത്തന്നൂര്‍ എം.എല്‍.എയുമായ ബി.ബി ഗോപകുമാറിന് വധഭീഷണി. വ്യാഴാഴ്ച വൈകിട്ട് നാലരയോടെയാണ് എം.എല്‍.എയെ അജ്ഞാതന്‍ ഫോണില്‍ വിളിച്ച് അസഭ്യം പറയുകയും വധഭീഷണി മുഴക്കുകയും ചെയ്തത്. സംഭവത്തില്‍ കൊല്ലം സിറ്റി പൊലിസ് കമ്മിഷണര്‍ക്ക് എം.എല്‍.എ പരാതി നല്‍കി.

ചാത്തന്നൂര്‍ പൊലിസ് എഫ്.ഐ.ആര്‍ രജിസ്റ്റര്‍ ചെയ്ത് വിശദമായ അന്വേഷണം ആരംഭിച്ചു. 

അപരിചിതനായ വ്യക്തി എം.എല്‍.എയെ ഫോണില്‍ വിളിച്ച് ഒരു ജോലി ആവശ്യം ഉന്നയിച്ചു. എന്നാല്‍ ജോലി നല്‍കാനുള്ള മാര്‍ഗ്ഗമില്ലെന്ന് എം.എല്‍.എ അറിയിച്ചതോടെ ഫോണ്‍ കട്ട് ചെയ്യുകയും ഉടന്‍ തന്നെ വീണ്ടും വിളിച്ചു.എന്നിട്ട് കഴക്കൂട്ടം എം.എല്‍.എയുടെ ഫോണ്‍ നമ്പര്‍ ആവശ്യപ്പെട്ടു. അത് നല്‍കാന്‍ സാധിക്കില്ലെന്ന് അറിയിച്ചതോടെയാണ് ഇയാള്‍ അസഭ്യവര്‍ഷം നടത്തിയും വധഭീഷണി മുഴക്കിയതുമെന്ന് ഗോപകുമാര്‍ പരാതിയില്‍ പറയുന്നു.

എറണാകുളം സ്വദേശിയുടെ പേരിലുള്ള സിംകാര്‍ഡില്‍ നിന്നാണ് ഭീഷണി സന്ദേശം എത്തിയതെന്ന് കണ്ടെത്തിയിട്ടുണ്ട്. എന്നാല്‍ ഇയാള്‍ തന്നെയാണോ ഫോണ്‍ ഉപയോഗിച്ചതെന്ന കാര്യത്തില്‍ നിലവില്‍ വ്യക്തതയില്ല. പൊലിസിന് പുറമെ കേന്ദ്ര ഇന്റലിജന്‍സും സംഭവത്തില്‍ അന്വേഷണം ആരംഭിച്ചതായാണ് റിപ്പോര്‍ട്ട്. 

Chathannoor MLA B. B. Gopakumar has reportedly received death threats and abusive messages, following which the police have registered a case. Authorities have begun an investigation into the incident and are examining the source of the threats.