കൊച്ചി: കശുവണ്ടി കോര്‍പറേഷന്‍ അഴിമതിയില്‍ വകുപ്പ് സെക്രട്ടറി കെ. ബിജു ഐ.എ.എസിന്റെ മാപ്പപേക്ഷ തള്ളി ഹൈക്കോടതി. കോടതിയോട് ഏറ്റുമുട്ടനായി നില്‍ക്കരുതെന്നും നിന്നാല്‍ ഒരു  സര്‍ക്കാരിനും രക്ഷിക്കാനാവില്ലെന്നും കോടതി വ്യക്തമാക്കി. ഉദ്യോഗസ്ഥര്‍ സര്‍ക്കാരിന്റെ ആയുധമാക്കരുതെന്ന് മുന്നറിയിപ്പ് നല്‍കിയ കോടതി പുതിയ സത്യവാങ്മൂലം സമര്‍പ്പിക്കാനും നിര്‍ദ്ദേശിച്ചു. 

പ്രോസിക്യൂഷന്‍ അനുമതി ഉത്തരവിലെ പരാമര്‍ശം അനുചിതമായിപ്പോയെന്നും എല്ലാ പദപ്രയോഗങ്ങളും പിന്‍വലിക്കുന്നതായും കാണിച്ചാണ് ബിജു മാപ്പപേക്ഷ സമര്‍പ്പിച്ചിരുന്നത്. കോടതിയലക്ഷ്യ കേസില്‍ ഹൈക്കോടതിയില്‍ നേരിട്ട് ഹാജരായാണ് മാപ്പപേക്ഷ നല്‍കിയത്.

കശുവണ്ടി വികസന കോര്‍പറേഷന്‍ അഴിമതിക്കേസിലെ പ്രതികളെ പ്രോസിക്യൂട്ട് ചെയ്യാന്‍ അനുമതി നല്‍കിയുള്ള ഉത്തരവില്‍ ഹൈക്കോടതി ഇടപെടലിനെക്കുറിച്ച് അവഹേളിച്ച് ഉത്തരവ് പുറപ്പെടുവിച്ചതുമായി ബന്ധപ്പെട്ടാണ് കോടതിയലക്ഷ്യ നടപടികളിലേക്ക് നീങ്ങിയത്.ഉത്തരവിലെ പരാമര്‍ശങ്ങള്‍ കോടതിക്കെതിരായതില്‍ ഖേദമുണ്ട്. ഉത്തരവില്‍ പിഴവ് ബോധ്യപ്പെട്ടതോടെ അത് പിന്‍വലിക്കുകയും പുതിയ ഉത്തരവിറക്കുകയും ചെയ്തുവെന്നും മാപ്പപേക്ഷയില്‍ ബിജു പറഞ്ഞു.