തിരുവനന്തപുരം: തിരുവനന്തപുരം മെഡിക്കല്‍ കോളജ് ആശുപത്രിയിലെ തിരക്ക് കുറയ്ക്കാന്‍ ആരോഗ്യമന്ത്രി കെ. മുരളീധരന്‍ സ്വീകരിച്ച നടപടികളെ അഭിനന്ദിച്ച് ഡോ. ഹാരിസ് ചിറയ്ക്കല്‍. രോഗികളുടെ തിരക്ക് നിയന്ത്രിക്കാനും തറയില്‍ കിടത്തി ചികിത്സ നല്‍കേണ്ട സാഹചര്യം ഒഴിവാക്കാനുമായി പുലയനാര്‍ക്കോട്ട ആശുപത്രിയില്‍ മെഡിസിന്‍ ഒ.പി ആരംഭിച്ചതായി മന്ത്രി പങ്കുവെച്ച സമൂഹമാധ്യമ പോസ്റ്റ് പങ്കുവെച്ചാണ് അദ്ദേഹം പ്രതികരിച്ചത്.

വളരെ നന്മനിറഞ്ഞ തീരുമാനമാണിതെന്നും മെഡിക്കല്‍ കോളജിലെ ചില ഡിപ്പാര്‍ട്‌മെന്റെുകള്‍ വേണമെങ്കില്‍ അങ്ങോട്ട് മാറ്റാന്‍ കഴിയുമെന്നും അദ്ദേഹം ഫേസ്ബുക്കില്‍ കുറിച്ചു. തിരുവനന്തപുരം മെഡിക്കല്‍ കോളേജില്‍ സ്ഥലസൗകര്യം പരിമിതമാണ്. പുതിയ കെട്ടിടങ്ങള്‍ നിര്‍മിക്കാനോ വാര്‍ഡുകള്‍ നിര്‍മിക്കാനോ സ്ഥലമില്ല. മൂന്ന് വര്‍ഷം മുമ്പ് 250 കിടക്കകളുള്ള ഒരു കെട്ടിടം പൊളിച്ചുനീക്കിയതോടെയാണ് തിരക്ക് കൂടുതല്‍ രൂക്ഷമായതെന്നും അദ്ദേഹം പറഞ്ഞു.

ALSO READ: വാമനപുരത്ത് രണ്ട് കെ.എസ്.ആര്‍.ടി.സി ബസുകളും കാറും കൂട്ടിയിടിച്ചു; അഞ്ച് പേര്‍ക്ക് പരുക്ക് 

പുലയനാര്‍ക്കോട്ടയില്‍ ആവശ്യത്തിന് സ്ഥലമുള്ളതിനാല്‍ ചില വിഭാഗങ്ങള്‍ അവിടേക്ക് മാറ്റുന്നത് പരിഗണിക്കാമെന്നും ജനറല്‍ ആശുപത്രിയെയും തൈക്കാട് ആശുപത്രിയെയും മെഡിക്കല്‍ കോളജുകളായി വികസിപ്പിക്കുന്നത് കൂടുതല്‍ രോഗികള്‍ക്ക് ഗുണകരമാകുമെന്നും അദ്ദേഹം ഫേസ് ബുക്കില്‍ കുറിച്ചു.

ഫേസ്ബുക്ക് പോസ്റ്റിന്റെ പൂര്‍ണരൂപം

വളരെ നന്മ നിറഞ്ഞ തീരുമാനം. അവശരായി വരുന്ന ജനങ്ങള്‍ക്ക് കിടക്കാന്‍ വൃത്തിയുള്ള ഒരു സ്ഥലം. ഒരു ബെഡ്. ശ്വാസ തടസ്സവും മാരകമായ രോഗങ്ങളും മരണ ഭീതിയും വേദനകളുമായി പ്രധാന ആശുപത്രികളില്‍ നിന്ന് റഫര്‍ ചെയ്തു വരുന്നവരെ കട്ടിലിന്റെ അടിയില്‍ തള്ളുന്നതും വരാന്തയില്‍ ഏതോ കോണില്‍ തള്ളുന്നതും പൊറുക്കാനാകാത്ത തെറ്റാണ്. എന്തായാലും കൃത്യമായ നടപടികള്‍ കൊണ്ട് അത് പരിഹരിക്കാന്‍ ശ്രമിക്കുന്ന ബഹുമാനപ്പെട്ട മിനിസ്റ്റര്‍ക്ക് അഭിനന്ദനങ്ങള്‍. തിരുവനന്തപുരം മെഡിക്കല്‍ കോളേജില്‍ സ്ഥലസൗകര്യം പരിമിതമാണ്. പുതിയ കെട്ടിടങ്ങള്‍ നിര്‍മിക്കാനോ വാര്‍ഡുകള്‍ നിര്‍മിക്കാനോ സ്ഥലമില്ല. മൂന്നു വര്‍ഷങ്ങള്‍ മുമ്പ് 250 ബെഡ്ഡുകള്‍ ഉണ്ടായിരുന്ന ബില്‍ഡിംങ് ഇടിച്ചു കളഞ്ഞതോടെയാണ്  തിരക്ക് ഇത്ര തീവ്രമായത്. പുലയനാര്‍ കോട്ട ധാരാളം സ്ഥലം ലഭ്യമാണ്. ചില ഡിപ്പാര്‍ട്‌മെന്റുകള്‍ തന്നെ വേണമെങ്കില്‍ അങ്ങോട്ട് മാറ്റാന്‍ കഴിയും. ജനറല്‍ ആശുപത്രി, തൈക്കാട് ആശുപത്രി ഇവ മെഡിക്കല്‍ കോളേജുകള്‍ ആക്കി മെച്ചപ്പെടുത്തുന്നത് ഒരുപാട് രോഗികള്‍ക്ക് സഹായകമാവും. ബേസിക് സ്‌പെഷ്യാലിറ്റികള്‍ക്ക് ഈ പുതിയ കോളേജുകളില്‍ കൂടുതല്‍ ശ്രദ്ധ നല്‍കി,  തിരുവനന്തപുരം മെഡിക്കല്‍ കോളേജില്‍ സൂപ്പര്‍ സ്‌പെഷ്യാലിറ്റി വിഭാഗങ്ങളായ കാര്‍ഡിയോളജി, ന്യൂറോളജി, നെഫ്രോളജി, ഒങ്കോളജി, പ്ലാസ്റ്റിക് സര്‍ജറി, കാര്‍ഡിയാക് സര്‍ജറി, യൂറോളജി, ട്രാന്‍സ്പ്ലാന്റേഷന്‍, ഗാസ്‌ട്രോ വിഭാഗം, ഇന്‍ഫെര്‍ട്ടിലിറ്റി, ജനിതക രോഗങ്ങള്‍, എന്‍ഡോക്രൈനോളജി, ക്യാന്‍സര്‍ സര്‍ജറി, റൊബോട്ടിക്‌സ് തുടങ്ങിയ വിഭാഗങ്ങള്‍ക്ക് കൂടുതല്‍ ഊന്നല്‍ നല്‍കുന്നത് നന്നായിരിക്കും. വളരെ വേഗം മുന്നേറുന്ന ആധുനിക ചികിത്സാരീതികള്‍ സാധാരണ ജനങ്ങള്‍ക്ക് ലഭ്യമാകുന്ന നടപടികള്‍ ദയവായി സ്വീകരിക്കണം. ഓരോ തീരുമാനങ്ങളും ഓഫീസുകളിലെ ചുവപ്പ് നാടയിലും അകപ്പെട്ട് ഇഴഞ്ഞു പോകാതെ, വേഗത്തില്‍ നടപ്പിലാക്കാനുള്ള മാര്‍ഗ്ഗങ്ങള്‍ സ്വീകരിക്കാനും ബഹുമാനപ്പെട്ട ആരോഗ്യ വകുപ്പ് മന്ത്രിയോട് അപേക്ഷിക്കുന്നു.

Dr. Harris Chirackal has praised the steps taken by Health Minister K. Muraleedharan to reduce congestion at Thiruvananthapuram Medical College Hospital.The minister shared on social media that a Medicine OP has been started at Pulayanarkotta Hospital to control patient rush and to avoid situations where patients have to be treated on the floor. Dr. Harris shared that post and expressed his appreciation.