ദുബൈ: വ്യോമയാന ചരിത്രത്തിലെ തന്നെ ഏറ്റവും വലിയ വിമാന നവീകരണ പരിപാടിയുടെ ഭാഗമായി 100-ാമത്തെ വിമാനവും നവീകരിച്ച് ദുബൈയുടെ സ്വന്തം എമിറേറ്റ്‌സ് എയർലൈൻസ്. 5 ബില്യൺ യുഎസ് ഡോളർ (ഏകദേശം 41,500 കോടിയിലധികം രൂപ) ചിലവ് കണക്കാക്കുന്ന ഈ വമ്പൻ പദ്ധതിയിലൂടെ തങ്ങളുടെ ഫ്ലീറ്റിന്റെ ആധുനികവൽക്കരണത്തിലാണ് എയർലൈൻ പുതിയ നാഴികക്കല്ല് പിന്നിട്ടത്.

2022 നവംബറിൽ ആരംഭിച്ച ഈ ദൗത്യത്തിലൂടെ ഇതുവരെ 47 എയർബസ് A380 വിമാനങ്ങളും 53 ബോയിംഗ് 777 വിമാനങ്ങളുമാണ് എമിറേറ്റ്‌സ് എഞ്ചിനീയറിംഗ് വിഭാഗം പൂർണ്ണമായും നവീകരിച്ചത്. ദുബൈയിലെ അത്യാധുനിക എഞ്ചിനീയറിംഗ് സൗകര്യങ്ങൾ ഉപയോഗിച്ച് വിമാനങ്ങളുടെ ഉൾഭാഗം പൂർണ്ണമായി മാറ്റിയെഴുതുകയായിരുന്നു.

4.4 ദശലക്ഷം മനുഷ്യ മണിക്കൂറുകൾ; സങ്കീർണ്ണമായ എഞ്ചിനീയറിംഗ് അത്ഭുതം

കഴിഞ്ഞ 44 മാസമായി തുടരുന്ന ഈ പദ്ധതിക്ക് പിന്നിൽ 400-ലധികം എഞ്ചിനീയർമാരുടെയും സാങ്കേതിക വിദഗ്ധരുടെയും കഠിനാധ്വാനമുണ്ട്. വിമാനങ്ങളുടെ നവീകരണത്തിനായി മാത്രം 4.4 ദശലക്ഷം മനുഷ്യ മണിക്കൂറുകളാണ് ഇതുവരെ ചെലവഴിച്ചത്.

ഓരോ വിമാനത്തിന്റെയും ക്യാബിൻ ഘടകങ്ങൾ പൂർണ്ണമായും അഴിച്ചുമാറ്റിയാണ് പുനർനിർമ്മിക്കുന്നത്. ഒരു എയർബസ് A380 നവീകരണത്തിന് 4,000-ത്തിലധികം ഭാഗങ്ങളിലും, ബോയിംഗ് 777 നവീകരണത്തിന് 2,500-ലധികം ഭാഗങ്ങളിലും സൂക്ഷ്മമായ ജോലികൾ ആവശ്യമാണ്.

2026 അവസാനത്തോടെ 20 വിമാനങ്ങൾ കൂടി നവീകരിക്കും. ആകെ 219 വിമാനങ്ങൾ പുതുക്കിപ്പണിയുക എന്ന ലക്ഷ്യത്തിന്റെ പകുതിയോളം ഇതോടെ പൂർത്തിയാകും. ആദ്യം 105 വിമാനങ്ങൾ മാത്രമായി പ്രഖ്യാപിച്ച പദ്ധതി, യാത്രക്കാരുടെ വർദ്ധിച്ച ആവശ്യകത മുൻനിർത്തിയാണ് 219 വിമാനങ്ങളിലേക്ക് ഉയർത്തിയത്.

പ്രീമിയം ഇക്കണോമി ക്യാബിനുകൾ സജ്ജമാകുന്നു

യാത്രക്കാർക്ക് കൂടുതൽ ആഡംബരവും സുഖസൗകര്യങ്ങളും നൽകുന്ന എമിറേറ്റ്‌സിന്റെ 'പ്രീമിയം ഇക്കണോമി' ക്യാബിനുകൾ വ്യാപിപ്പിക്കാൻ ലക്ഷ്യമിട്ടാണ് പദ്ധതി നടപ്പിലാക്കുന്നത്. ഇതുവരെ 3,800-ലധികം അത്യാധുനിക പ്രീമിയം ഇക്കണോമി സീറ്റുകൾ വിമാനങ്ങളിൽ സ്ഥാപിച്ചുകഴിഞ്ഞു. ഇത് എമിറേറ്റ്‌സിന്റെ ആഗോള ശൃംഖലയിലെ കൂടുതൽ രാജ്യങ്ങളിലേക്കുള്ള സർവീസുകളിൽ ലഭ്യമായിത്തുടങ്ങിയിട്ടുണ്ട്.

പദ്ധതിയുടെ അടുത്ത ഘട്ട നവീകരണം 2026 ഒക്ടോബറിൽ ആരംഭിക്കും. ഈ ഘട്ടത്തിൽ വിമാനങ്ങളിൽ അത്യാധുനിക 4K OLED HDR10+ സീറ്റ്ബാക്ക് സ്‌ക്രീനുകളും, ഫ്രഞ്ച് കമ്പനിയായ സഫ്രാന്റെ പുതിയ 'Z400 ലൈറ്റ്‌വെയ്റ്റ്' സീറ്റുകളും ഉൾപ്പെടെയുള്ള വിപ്ലവകരമായ മാറ്റങ്ങളാണ് എമിറേറ്റ്‌സ് കൊണ്ടുവരുന്നത്.

ALSO READ: ഇന്ത്യൻ യാത്രികർക്കായി എമിറേറ്റ്‌സിന്റെ വമ്പൻ പ്രഖ്യാപനം; ഇനി വിമാന ടിക്കറ്റ് നിരക്ക് മാസ തവണകളായി അടയ്ക്കാം

Emirates has completed the retrofit of its 100th aircraft as part of its $5 billion fleet modernization programme, enhancing passenger comfort, onboard technology, and travel experience across its global network.