ഗൂഡല്ലൂര്‍: വര്‍ഷകാലത്തും കാര്യമായി മഴ ലഭിക്കാതായതോടെ മുതുമല വന്യജീവി സങ്കേതം വരള്‍ച്ചയുടെ പിടിയില്‍. വേനലില്‍ വന്യമൃഗങ്ങള്‍ക്ക് കുടിവെള്ളത്തിനായി നിര്‍മിച്ച കുളങ്ങളെല്ലാം വറ്റിവരണ്ട നിലയിലാണ്.
ശിങ്കാര, മസിനഗുഡി വനമേഖലയിലെ ആറ് കുളങ്ങളാണ് ഇതിനകം തന്നെ വറ്റിവരണ്ടത്. കൂടാതെ വനത്തിലെ ജല സ്രോതസുകളെല്ലാം വരണ്ടുണങ്ങി തുടങ്ങിയിട്ടുണ്ട്. സാധാരണഗതിയില്‍ എപ്രില്‍, മെയ് മാസങ്ങളിലാണ് വരള്‍ച രൂക്ഷമാകാറ്.
എന്നാല്‍ ഇത്തവണ മഴയുടെ ലഭ്യതയിലുണ്ടായ ഗണ്യമായ കുറവാണ് സെപ്റ്റംബറില്‍ തന്നെ വരള്‍ച ബാധിക്കാന്‍ കാരണം.
കാടുണങ്ങിയതോടെ വന്യമൃഗങ്ങള്‍ കുടിവെള്ളം തേടി വനാതിര്‍ത്തികളിലെ ജനവാസ കേന്ദ്രങ്ങളിലെത്തി തുടങ്ങിയിട്ടുണ്ട്. വരള്‍ച രൂക്ഷമായാല്‍ ഇത്തവണ ജനവാസകേന്ദ്രങ്ങളില്‍ വന്യമൃഗ ശല്യവും രൂക്ഷമാകും. കഴിഞ്ഞ വര്‍ഷങ്ങളില്‍ വരള്‍ച്ചാ കാലത്ത് ടാങ്കറില്‍ വെള്ളമെത്തിച്ച് വനത്തിലെ കുളങ്ങള്‍ നിറച്ചിരുന്നു.
ഇത്തവണയും ഇത്തരത്തില്‍ വെള്ളം മെത്തിക്കാനാണ് വനം വകുപ്പ് തീരുമാനം. കാടിന് പുറമേ നീലഗിരി ജില്ലയിലെ കര്‍ഷകരും കൃഷിക്കാവശ്യമായ വെള്ളമില്ലാതെ ദുരിതത്തിലായിരിക്കുകയാണ്. പല കര്‍ഷകരും പണം നല്‍കി ടാങ്കറില്‍ വെള്ളമെത്തിച്ചാണ് കൃഷിയിടം നനക്കുന്നത്.
ഡീസല്‍ മോട്ടോര്‍ ഉപയോഗിച്ച് കൃഷിയിടത്തിലേക്ക് വെള്ളമെത്തിക്കാന്‍ ഡീസല്‍ സബ്‌സിഡ് നിരക്കില്‍ കര്‍ഷകര്‍ക്ക് വിതരണം ചെയ്യണമെന്നും കര്‍ഷകര്‍ ആവശ്യമുന്നയിച്ചിരുന്നു.