കാട്ടാമ്പള്ളി: ആവേശത്തുഴയെറിഞ്ഞ് കാട്ടാമ്പള്ളി പുഴയില്‍ നടന്ന രണ്ടാമത് ജലോത്സവത്തിന് ആവേശകരമായ പരിസമാപ്തി. ഡി.ടി.പി.സിയുടെ സഹകരണത്തോടെ കാക്കത്തുരുത്തി ബോട്ട് ക്ലബ് സംഘടിപ്പിച്ച ഉത്തര കേരള വള്ളംകളി മത്സരത്തില്‍ രണ്ടിനത്തിലും എ.കെ.ജി മയ്യിച്ച ജേതാക്കളായി. 15 പേര്‍ തുഴയുന്ന വിഭാത്തിലും 25 പേര്‍ തുഴയുന്ന വിഭാത്തിലുമാണ് എ.കെ.ജി മയ്യിച്ച ഒന്നാമതെത്തിയത്. എ.കെ.ജി പൊടോത്തുരുത്തിയാണ് ഇരു വിഭാഗത്തിലും രണ്ടാം സ്ഥാനക്കാര്‍. കണ്ണൂര്‍, കാസര്‍കോട് ജില്ലകളില്‍ നിന്നായി ഒന്‍പത് ടീമുകള്‍ വീതം മത്സരിച്ചു. 25 പേര്‍ തുഴയുന്ന മത്സരത്തില്‍ ട്രാക്ക് മാറിയതിനെ ചൊല്ലി ടീമുകള്‍ തമ്മില്‍ വാക്തര്‍ക്കമുണ്ടായി.
ജലോത്സവം കെ.എം ഷാജി എം.എല്‍.എ ഉദ്ഘാടനം ചെയ്തു. ജില്ലാ പഞ്ചായത്ത് അംഗം അജിത്ത് മാട്ടൂല്‍ അധ്യക്ഷനായി. നാറാത്ത്, ചിറക്കല്‍ ഗ്രാമപഞ്ചായത്ത് പ്രസിഡന്റുമാരായ കെ ശ്യാമള, എ സോമന്‍, കല്ല്യാശേരി ബ്ലോക്ക് പഞ്ചായത്ത് അംഗം കെ.പി നിഷ, ഡി.ടി.പി.സി സെക്രട്ടറി സജി വര്‍ഗീസ്, ബോട്ട് ക്ലബ് ഭാരവാഹികളായ പി ശിവദാസ്, കെ.എം ജയപ്രകാശ് ലാല്‍ സംസാരിച്ചു. ജില്ലാ പഞ്ചായത്ത് പ്രസിഡന്റ് കെ.വി സുമേഷ് വിജയികള്‍ക്ക് ട്രോഫികള്‍ വിതരണം ചെയ്തു.